نیویارک۔ 05مارچ (اے پی پی) اقوام متحدہ ٹی پاکستان نا آخبتی مندوب ڈاکٹر ملیحہ لودھی پارینے کہ بھارت تون جاری تنکی نا اوغان امن عمل آ سنگین زہم تمنگ کیک، پاکستان و بھارت نا نیام اٹ ساڑی بے چیٹی تا سوب آن پاکستان نا پورو چکار دے ٹکی سیم آ مریک۔ امریکی ٹی وی چینل فاکس نیوز ءِ انٹرویو ٹی اوپارے کہ ننا چکار ہمو کنڈامریک ہراکنڈآن نن دا محسوس کین کہ ننے فوجی گڑتی مون تروک ءِ۔ اوپارے کہ پاکستان ءِ ساڑی آ گڑتی بھارت آن مون تروک ءِ، اوغان امن عمل کن امریکہ نا خصوصی نمائندہ زلمے خلیل زاد و طالبان تا ڈپٹی لیڈر ملا عبدالغنی برادر نا نیام اٹ مذاکرات قطر انا دارالحکومت دوحہ ٹی مننگ ءِ۔ دا مذاکرات کڑدہ غاتا نیام اٹ اولیکو وار مننگ ءِ۔ ڈاکٹر ملیحہ لودھی پارے کہ اوغانستان و کشمیر ہڑتوم آ ویل آک بے کچ اہمیت تخرہ۔ اوپارے کہ دا دے ٹکی سیم ءِ ہراکان بھارت پاکستان آ جلہو کرے۔ اوتینا جہاز آتے پاکستانی علاقہ غا گدریفے، دا سیم بے چیٹ مسنے وخت اس کہ دانا برعکس اوغانستان نا حالیت آک جتا ءُ۔ ننا است خواہی ءِ کہ او جنگ بند مرے و ننے دیکی سیم آن ہچ ءُ خطرہ اس نظر بفننگ ءِ۔ دا ننا دے ٹکی سیم ءِ ہراکان پاکستان ءِ پدریسہ گڑتی تتون مون تروک ءِ۔ پاکستان داوخت آ اسہ بے چیٹ حالیت آتا نیام اٹ اختہ مسنے، ڈاکٹر ملیحہ لودھی پارے کہ بھارتی سرکڑدہ غاک وزیراعظم عمران خان نا کنڈآن وار وار امن نا سلہ نا ورندی ءِ تننگ اٹ پدریسہ بے سہب مسنو ہرافتے ٹی بھارتی پائلٹ نا یلہ کننگ ہم اوار ءِ۔ پاکستانی مندوب پارے کہ پاکستان بھارت ءِ دا پارسا کرینے کہ او ننے پلوامہ جلہو نا شاہدی ایتے تانکہ نن اوڑا کارروائی اس کننگ کین۔ اوپارے کہ منہ دے مست بھارت اٹی پاکستان ءِ دا بابت اسہ ڈوزیئر اس ہم تسنے ہرانا نن جاچ ءِ ہلنگ اُن و اگہ داڑان گڑاس پیش تمک تو نن اوڑا کارروائی کینہ و نن دا ہرینہ کہ داٹی ٹھوس شاہدی ارے یا آخا۔ اوپارے کہ بیرہ دوبہ غاتا بنداو آ ہچ ءُ کارروائی اس مننگ کپک۔ کشمیر نا بارواٹی ہریفوک آ اسہ سوج اسے نا ورندی ٹی پاکستانی سفیر پارے کہ دا جھیڑہ تدوک آ 70 سال آن ایسر نا چاری ءِ و دانا بایدے ایسری اس پٹنگے۔ اوپارے کہ ہراتم اسکان داویل ءِ ایسر کننگپک بھارت و پاکستان نا نیام اٹ بے چیٹی و چک و تاڑ برجا سلک۔ اوپارے کہ اقوام متحدہ نا سلامتی کونسل نا ایجنڈا ٹی کشمیر نا ویل ساڑی ارے و دانا ایسری کن داوخت اسکان ہچ ءُ کوشست اس کننگتنے۔ دا ہیت ذکر انا قابل ءِ کہ مقبوضہ کشمیر اٹی 14 فروری آ مروک آ خودکش جلہو اٹی 40 آن زیات بھارتی پیرا ملٹری فورس آتا کارندہ غاک خلنگاسر ہرانا دوبہ ءِ بھارت پاکستان آ بیٹ کریسس ولے پاکستان پیدوار کریسس کہ اونا دا جلہو تون ہچ ءُ دُو اس اف و پاکستان دانا جاست و پاست اٹی کمک نا سلہ خلکوسس ولے اوکان پد ہم بھارت پاکستانی علاقہ غاتے ٹی جہاز آتا کمک اٹ بمب خسا۔
