اسلام آباد۔ 2 مارچ (اے پی پی) پاکستان ءُُ بھارتءِ میان ءَ جیڈھ ءِ تہ کمی ھاترا گہتریں کرد ادا کنگ ءِ سرا مزن وزیر عمران خان ءِ ھاترا نوبل امن ایوارڈ دیگ ءِ لوٹ ءِ منگ نامہ راجی اسمبلی سیکرٹریٹ ءِ تہ جم کنگ بوتگ۔اے منگ نامہ بنجاہی وزیر ھالرسانی ءُُ شنگکاری چوہدری فواد حسین ءَ جم کتگ ایشی ءِ تہ گوشگ بوتگ کہ پاکستان ءُُ بھارت ءِ میان ءَ انوگیں جیڈھ ءِ تہ کمی ءِ ھاترا مزن وزیر عمران خان ءَ ھوش ءُُ عقلمندی ءَ گوں کرد ادا کتگ۔منگ نامہ ءِ متن ءَ گوشگ بوتگ کہ بھارتی راھشون جنگی جنون ءُُ جارحانہ تب ءَ دو ایٹمی ملکاں را جنگ ءِ تہ مان کتگ۔متن ءَ گیش گوشتگ ات کہ مزن وزیر عمران خان ءَ شریں ءُُ گہتریں کرد ادا کنان ءَ جاورءَ را شریں نیمگا دیم داتگ۔منگ نامہ ءَ نبشتہ کنگ بوتگ ات کہ خطہ ءِ تہ امن ءُُ ایمنی ءِ ھاترا مزن وزیر عمران خان ءَ امن ءِ نوبل داد دیئگ بیت۔
