اسلام آباد۔ 01 مارچ (اے پی پی) اسلامی نظریاتی کونسل نا چیئرمین ڈاکٹر قبلہ ایاز پارینے کہ سوشل میڈیاءِ بے تک و منفی کاریم اٹ اتنگ آن اُرائی و راجی زند اٹی ویل ودی مننگ ءِ، سوشل میڈیاءِ جوان وڑاٹ کاریم اٹ اتنگ کن آگاہی نا بابت سلاہ وسوج آتے حکومت آ گدریفینہ۔ داخیال آتا درشانی ءِ او ’’اے پی پی‘‘ تون گپ و تران کرسا کرے۔ ڈاکٹر قبلہ ایاز پارے کہ راجی ذرائع ابلاغ ءِ بے تک کاریم اٹ اتنگ آن معاشرتی ، راجی و خاہوتی ویل ودی مننگ ءِ انتئے کہ خلقت نا براہ راست رابطہ کم مننگ ءِ ہراڑان اُرانا چاگڑد ہم زہمی مننگ ءِ۔ اوپارے کہ سوشل نا ودوک آ کاریم اٹ اتنگ آن ایڑھ ایلم، ارے زائیفہ تون اوار ایلو خڑک انا سیال و قریب آتا تین پہ تینی اوڑدہی و گپ و تران اٹی کمتی آن زند آن مرتمنگ ءُ، انتئے کہ اسہ اُراسے ٹی رہینگوک آ بندغ آک اسہ ایلو ہیت وگپ کپسہ ولے او سوشل میڈیا نا کمک اٹ مچ آ دنیا تون رابطہ ٹی مریرہ۔ اوپارے کہ دا بابت تعلقدار ادارہ غاک تینا کڑد ادا کرسا معاشرتی و راجی آسراتی کن خلقت اٹی بایدے آگاہی اس تالان کیر تانکہ خاہوت و راج انا چاگڑد اٹی جوانی اتنگ مرے۔ اوپارے کہ اگہ سوشل میڈیا نا منفی زہم ارے تو ہموڑے اونا بے شمار مثبت نتیجہ ہم مون آ بننگ ءِ۔
