اسلام آباد۔ 01مارچ (اے پی پی) بنجائی وزیر ریلوے شیخ رشید احمد پارینے کہ ترکی پاکستان نا بے کچ پت انا قابل سنگت اسلامی ءُ ملک اسے، پاکستان و ترکی مدام اسہ ایلو تون تفینو، ڈیہہ نا ساڑی حالیت آتے ٹی پاکستان نا موقف نا پورو مخ تفی آ ترکی الس نا منت وار اُن۔ پاکستان اٹی ترکی نا سفیر احسان مصطفی یرداکل تون جمعہ نادے آ اوڑدہی ٹی گپ و تران کرسا بنجائی وزیر ریلوے پارے کہ پاکستان ریلوے ءِ پوسکن آ وڑوڈول آتیا شون تننگ انگ ءِ و پاکستان ریلوے نا شونداری کن ترکی نا آزموندہ غاتیان فائدہ ہرفک ، است خواہی ءِ کہ ترک صدر رجب طیب اردگان نا پاکستان نا دورہ ٹی پاکستان و ترکی نا نیام اٹ ریل شریداری آ ہم عملی گام گیج مرے۔ وزیر ریلوے ترکی نا ریل کمپنی تے ایم ایل II و III کوئٹہ زاہدان و تفتان (ایران) ریل لین نا اپ گریڈیشن اٹی شریداری نا سلہ خلسا پارے کہ ترکی لوکوموٹو فیکٹری رسالپور اٹی شریداری کے۔ پاکستان ریلوے ہروڑ کمک کیک۔ اوپارے کہ اودے خوشی ءِ کہ ترکی نا نجی ریل کمپنیک مال و مسافر بردار بوگی تا جاری ٹینڈر اٹی است خواہی ظاہر کننگ ءُ۔ بنجائی وزیر پارے کہ ڈیہہ نا ساڑی حالیت آتے ٹی پاکستان نا موقف نا پورو مخ تفی آ ترکی و ترک الس نا منت وار اُن، ترکی پاکستان نا بے کچ پت انا قابل و خاص ءُ سنگت اسے و پاکستان و ترکی مدام اسہ ایلو تون سلوک ءُ۔
