اقوام متحدہ۔ 01مارچ (اے پی پی) اقوام متحدہ ٹی پاکستان نا آخبتی مندوب ملیحہ لودھی پارینے کہ جہانی برادری پاک بھارت بے چیٹی تے چٹفنگ خواہک۔ اقوام متحدہ ٹی پاکستان نا آخبتی مندوب اقوام متحدہ نا سیکرٹری جنرل نا دفترتون گنڈوک سفارت کار و خاص کر سلامتی کونسل نا آخبتی باسک آتون اوار ایلو سفارتی برادری ءِ پاکستان نا برخلاف بھارتی جارحیت و داڑان ودی مروک آ پدریسہ بے چیٹ حالیت آتیان معلومدار کرسا پارے کہ وزیراعظم عمران خان نا کنڈآن امن نا کلہو نا وڑاٹ دزگیر بھارتی پائلٹ ءِ یلہ کننگ نا پڑو آن پد ہم بھارت بے چیٹی تا بابت سنجیدہ اف۔ اوپارے کہ ہمسایہ ملک آتا بے چیٹی تے چٹفنگ نا زمواری داسہ بھارت آٹی ءِ۔ اقوام متحدہ نا سیکرٹری جنرل انتونیوگوتریش نا چیف آف اسٹاف ماریا لوز اریبیروووٹی آن پد اے پی پی تون اسہ انٹرویو اسے ٹی اوپارے کہ سیکرٹری جنرل نا آفس نا کمامدارآتون کیہی وار اوڑدہی کرینے۔ اوپارے کہ داسہ پاکستان اومیت کیک کہ داسہ بھارت ہم ننا امن کلہو نا جوان ءُ ورندی اس ایتک و تین پہ تینی جھیڑہ غاتا ایسری کن مذاکرات کن تیار مریک۔ اوپارے کہ پلوامہ واقعہ غان پد وزیراعظم عمران خان نا کنڈآن کمک، بھارتی پائلٹ نا یلہ کننگ تون اوار بامسخت مذاکرات نا کیہی وار سلہ خلنگانے ولے داکان پد ہم حالیت آتا بے چیٹی کم متو و بھارت دابابت داسکان ہچ ءُ جوان ءُ گام گیج اس کتنے۔ اوپارے کہ جہانی سفارتی برادری تون اوڑدہی تیٹی بے چیٹی تا چٹفنگ نا خواست کننگانے و پاکستان ہم ہندن خواہک۔ پاکستانی سفیر پارے کہ یو این سفارتی مشن تے دوست ملک آتا کنڈآن بے چیٹی تا چٹفنگ کن کروک آ گام گیج آتیان ہم معلومدار کرینے ولے داسکان بھارت فوجی بے چیٹی تا چٹفنگ کن ہچ ءُ پیش رفت اس کننگ کتنے۔ اوپارے کہ سلامتی کونسل نا آخبتی باسک آتون اوار برادر اسلامی ملک آتا سفارت کار آتون رابطہ کننگ انگ ءِ و ترکی پاکستانی موقف نا پبی مخ تفی نا باوری ترفینے ہراڑانن اونا منت وار اُن۔
