اسلام آباد۔ 01مارچ (اے پی پی) وزیراعظم نا سلاہکار موسمیاتی بدلی ملک امین اسلم پارینے کہ وزیراعظم عمران خان بھارتی پائلٹ نا ہنکینی نا خیر سگالی نا جوزہ نا رداٹ درست ءُ فیصلہ اس کرے، پاکستان نا اوآئی سی نا فورم اٹی بھارتی وزیر خارجہ نا ساڑی گری ٹی ہِنپننگ نا فیصلہ درست ءِ۔ جمعہ نادے آ پارلیمنٹ ہاؤس نا پیشن میڈیا تون گپ و تران کرسا اوپارے کہ وزیراعظم عمران خان بھارت آ پیدوار کرینے کہ پاکستان ڈیہہ ٹی امن خواہک، جنگ آک ویل آتا ایسری اس کشپسہ داڑان ہڑتوم آ کنڈآتا الس ءِ نسخان مریک۔ اوپارے کہ وزیراعظم عمران خان بھارتی پائلٹ نا یلہ کننگ نا فیصلہ ءِ خیر سگالی نا جوزہ نا رداٹ کرینے ہرانا جہانی کہول آہم ستاءِ کننگ انگ ءِ، پاکستان نا دافیصلہ ءِ جہانی برادری جوان ءُ گام گیج اس گوندانے۔ ملک امین اسلم پارے کہ بھارتی وزیراعظم نا رویہ جارحانہ ءِ ، او ڈیہہ ٹی امن ءِ لتاڑنگ اٹ لگوک ءِ ، گچین کاری تیٹی سرسہبی دوئی کننگ کن جنگی جنون اوڑا سوار ءِ، او ڈیہہ ٹی امن نا خواہندار اف، اوپارے کہ پاکستان او آئی سی نا فورم اٹی ہِنپننگ نا درست فیصلہ اس کرے و اوآئی سی بھارتی وزیر خارجہ ءِ پاکستان ءِ پت اٹی ہلنگ آن بیدس بٹنگانے ہرادے پاکستان امنا کپک۔
