اسلام آباد۔ 01 مارچ(اے پی پی) وزیر دفاع پرویز خٹک پارینے کہ بھارت دُوارہ جلہو کرے تو ہندی ءُ ورندی اس ایتینہ کہ تاریخ یات کیک، ورندی تننگ نا لائخی تخنہ، جنگ انا آخا امن نا خواہندار اُن، کشمیر نا ویل انا ایسری اسکان ڈیہہ ٹی امن بننگ کپک، ویل آتا ایسری کن مذاکرات نا بناءِ کننگے۔ جمعہ نادے آ پارلیمنٹ نا اسیجا دیوان اٹی گپ و تران کرسا وزیر دفاع پرویز خٹک پارے کہ پاک فوج، پاک فضائیہ و خاص کر حسن صدیقی ءِ مبارکبادی ایتیوہ، ملک انا خاطر ننا فوج ہروڑنا قربانی تسنے و ترسا کیک، اپوزیشن ہراسیوت و یکجہتی نا درشانی ءِ کرینے اونا ہم ستاءِ کیوہ و اومیت کیوہ کہ داوڑءُ چاگڑد اس پین وخت اس ہم برجاسلک، وزیراعظم بھارت ءِ سوگو ءُ کلہو اس تسنے، دشمن ننے آ نن نا تہاری ٹی جلہو کرے ، اونا خیال ئس کہ نن چُپ کینہ ۔ اوفک نن نا تہاری ٹی جلہو کریر، نن دے انا روشنائی ٹی ورندی ءِ ترسا ثابت کرین، اوفتے ورندی تننگ نا لائخی تخنہ، پاکستان نا فوج آ گمر ءِ ، حکومت پاکستان و الس نا کنڈآن بھارت ءِ اسہ وار ولدا تولسا ہیت وگپ کننگ نا سلہ ایتیوہ انتئے کہ نن جنگ انا خواہندار افن، امن نا خواہندار اُن تانکہ ڈیہہ ٹی شونہالی برے۔
