اسلام آباد۔ 01مارچ (اے پی پی)پاکستان نا پارلیمان اسیجا قرارداد نا امنائی اٹ منظوری ءِ تسنے ہراٹی 26 و 27 فروری آ پاکستان نا برخلاف بھارتی جارحیت نا ترندی اٹ مذمت ءِ کرسا بھارتی دعویٰ تے پورو وڑاٹ مسترد کرینے وپارینے کہ مچ آ پاکستانی قوم تینا سلہہ بند فوج اتون یکجا سلوک ءُ، پاکستان 27 فروری آ تینا دفاع نا حق ، عزم و لائخی نا درشانی ءِ کرینے۔ جمعہ نادے آ پارلیمنٹ ہاؤس نا اسیجا دیوان اٹی وزیر خارجہ شاہ محمود قریشی نا کنڈآن غٹ سیاسی جماعت آتا سلابت آن پد پیش کروک آ قرارداد اٹی پاننگانے کہ اسیجا دیوان 26و 27 فروری آ بھارتی جارحیت نا ترندی اٹ مذمت ءِ کیک، ہرا اقوام متحدہ نا چارٹر، جہانی کانود و ریاست آتا نیام اٹ قدر نا خلاف ورزی ءِ۔ اسیجا دیوان پاکستان اٹی دہشت گرد آتا پاننگوک ٹھکانہ غاتا بھس کاری و بھلو جانی نسخان اسے نا بھارت نا خودساختہ دعویٰ تے سختی اٹ مسترد کیک۔ دیوان دا پیدواری ءِ کیک کہ ڈغاری راستکی بھارت نا دعویٰ تا پورو وڑاٹ نفی ءِ کیک ہرادے آجو مبصرآک ہم پک کرینو۔ دا ایوان پاک فضائیہ نا کنڈآن وخت آ و گچین گام گیج آتا ستاءِ کرینے ہراڑان بھارتی جلہو ءِ ہچ ءُ جانی و مالی نسخان اسے آن بیدس بے سہب کننگا۔ اسیجا دیوان14 فروری آ پلوامہ جلہو آن پد بھارت نا کنڈآن پاکستان آ بیٹ کروک آ بے بنداو دوبہ غاتا مذمت ءِ کیک ہرافتے سیاسی مسخت آتے کن بیٹ کننگا۔ دا ایوان پیدواری کیک کہ دا جلہو آن پدبھارتی حکومت نا گام گیج آک گچین کاری مسخت آتا دوئی کننگ کن کننگانو۔ دا ایوان پاکستان نا وزیراعظم و غٹ سیاسی جماعت آتا کنڈآن 19 فروری آ تروک آ بیان تا یات دہانی کرفک ہرافتے ٹی پلوامہ جلہو آن پد پاکستان نا کنڈآن بھارت ءِ جاست وپاست اٹی کمک و عمل نا قابل شاہدی تا تننگ نا حالیت اٹ کارروائی نا پیش کش کننگا۔ دا ایوان زور شاغک کہ بھارت نا کنڈآن 26 و 27 فروری آ بھارت نا کنڈآن کروک آ کارروائی غیر زموارانہ ءِ ہرا سویلی ایشیا نا امن و سوگوی ءِ سنجیدہ گڑتی آن دوچار کرینے۔
