کوئٹہ۔ 28 فروری (اے پی پی) صوبائی وزیر اطلاعات و ہائر ایجوکیشن ظہور احمد بلیدی پارینے کہ بلوچستان اٹی مواصلات و بنداوی ڈھانچہ نا شونداری صوبائی حکومت نا اولیت آتے ٹی اوار ءِ۔ داخیال آتا درشانی ءِ او میر مزار بلوچ نا کماشی ٹی یونین کونسل پیدارک نا اسہ ڈل اسے تون گپ و تران کرسا کرے۔ ڈل انا ایلو باسک آتے ٹی قمبر بزنجو و شاہجان بزنجو اوار ئسر۔ اوپارے کہ ہراتم نن اقتدار ءِ سنبھالان تو بلوچستان اٹی مواصلات نا نظام خرابی نا گواچی ئس ولے داسہ داٹی پدریسہ گچینی بننگ ءِ اوپارے کہ تربت بلیدہ شاہراہ نا جوڑ کننگ نا بنا یقیناًصوبائی حکومت نا کوشست آتا بھرم ءِ۔ صوبائی وزیر پارے کہ تربت بلیدہ روڈص انا جوڑ کننگ بے کچ ترندی اٹ برجاءِ ہرانا پوروی اینخو نا سال جون اسکان ریکارڈ مد اٹ پورو مریک۔ ہراڑان خلقت ءِ ہن و بر اٹی آسانی دوبریک و تربت آن بلیدہ نا فاصلہ ءِ نیم گھنٹہ ٹی کننگک داٹی او ڈل انا باسک آتے باوری ترفسا پارے کہ بروک آ مرحلہ ٹی زوت تربت پسنی شاہراہ آ کاریم نا بناءِ کننگک ہراڑان علاقہ ٹی ٹرانسپورٹ نا نظام اٹی گچینی بریک و خلقت نا سفری آسراتیک پین جوان مریرہ۔ اوپارے کہ پسنی تربت روڈ انا پوروی آن پد تربت آن پسنی نا پند ءِ 2گھنٹہ آن ہم وخت اٹی طے کننگک۔ ایسر اٹی ڈل صوبائی وزیر اطلاعات ءِ علاقہ ٹی پِر تا سوب کشاری ڈغار تے نسخان آتا بارواٹ ہم معلومدار کرے۔
