راولپنڈی۔ 28 فروری (اے پی پی) پاک فوج ہر بھارتی جارحیت تون مون تننگ کن لین آف کنٹرول (ایل او سی) آ پورو وڑاٹ الرٹ ءِ، الس ہوشیار مرے ہوکاتیا چکار کپ و زمواری اتون سوشل میڈیا ءِ کاریم اٹ اتیر۔ پاک فوج انا شعبہ تعلقات عامہ (آئی ایس پی آر) نا رداٹ پاک فوج انا دستہ و جم وڑاٹ پاکستان نا ہرمسٹ آ سلہہ بند فوج بھارتی جارحیت تون مون تننگ کن پورو وڑاٹ الرٹ ءُ۔ تدوک آ 48گھنٹہ ٹی بھارت نا کنڈآن ایل او سی آ بے خار سم کاری ٹی ودکی مسنے۔ آئی ایس پی آر نا رداٹ کوٹلی، کھوئی رٹہ، تتہ پانی سیکٹر آتے ٹی بھارت نا کنڈآن بے خار سم کاری نا چرجوئی برجاءِ و بھارت نا کنڈآن جنگ بندی معاہدہ نا خلاف ورزی ءِ کننگ انگ ءِ۔ آئی ایس پی آر نا رداٹ پاک فوج انا دستہ غاک گچین ورندی سم کاری کریر ہراٹی بھارتی فوجی تا تپاخت و بھارتی فوج انا پوسٹ آتا بھس کاری نا حوال آک ءُ۔ بھارتی فوج انا کنڈآن ایل او سی آ شاری آبادی آ سم کاری ٹی 4شاری شہید و اِراشاری ٹھپی مسر۔ آئی ایس پی آر نا رداٹ ہر بھارتی جارحیت تون مون تننگ کن لین آف کنٹرول (ایل او سی ) آ پاک فوج انا دستہ غاک ہائی الرٹ ءُ وخت اس کہ پاک فضائیہ و پاک بحریہ ہم پورو وڑاٹ الرٹ ءُ۔
