اسلام آباد۔ 28فروری (اے پی پی) وزیراعظم عمران خان امن نا نشانی نا وڑاٹ بھارتی پائلٹ ءِ یلہ کننگ نا پڑو ءِ کرسا پارینے کہ پاکستان و بھارت نا نیام اٹ مچ آ جھیڑہ کشمیر نا سوب آن ءِ، نریندر مودی و ہندوستان ءِ ننا کلہو ءِ کہ او کاٹم آن گدرینگ انگ نا کنڈا معاملہ غاتے دپس۔ اوفک داسہ داکان بایدے مون آہنپس، ہندوستا ن انتس کہ کیک پاکستان اونا ورندی ءِ تننگ کن بیوس مریک، پاکستان و بھارت تون ہراوڑنا سلہہ ارے دافتے ٹی تو جنگ انا بایدے سجفپننگے، ننا فوج جوان ءُ جنگ اس کروک ءُ فوج اسے، شاہدی تننگ نا جاگہ غا بھارت اٹی جنگی جنون ءِ سیبو تننگا ، ہندوستان نا بیوسی ءِ کہ او گچین کاری تے کن داوڑنا چمبازی ءِ کاریم اٹ اتے۔ بے چیٹی تے کم کننگ نا ننا استخواہی ءِ نزوری تکنگپ، بھارت پلوامہ جلہو نا بابت ڈوزیئر پاکستان نا برخلاف جارحیت، اقوام متحدہ نا چارٹر و جہانی کانود نا خلاف ورزی ءِ کننگ آن پد گدریفے، کشمیری تا تینا تحریک بھارتی بیدادی نا سوب آن ودسا ہِننگ ءِ، بھارت ءِ بایدے دا سجفوئی مرے کہ کشمیری ورناک دا انتہااسکان انت اکن سرمسر کہ اوفتے کہینگ نا ہم خلیس اف، بھارت ظلم و جبر اٹ تینا مسخت آتے دوئی کننگ کپک، اومیت ءِ کہ جہانی برادری ہم بے چیٹی تا چٹفنگ کن تینا کڑد ءِ ادا کیک، ننا میڈیا داحالیت آتے ٹی زمواری نا درشانی ءِ کرے، بھارت نا میڈیا ہم 70 ہزار تپاخت کروک آتے خناکہ تو داوڑنا جنگی جنون ءِ تالان کتوکہ۔ پنچ شنبے نادے آ پارلیمنٹ نا اسیجا دیوان آن تران اٹی وزیراعظم عمران خان پارے کہ ساڑی حالیت آتے ٹی پارلیمان اٹی ہراسیوت نا درشانی ءِ کننگا او ستاکڑزک۔
