اسلام آباد۔ 28 فروری (اے پی پی) بنجائی کابینہ بھارتی جارحیت نا پبی ورندی ءِ تننگ آ سلہہ بند فوج انا ستاءِ کرسا تینا علاقائی سالمیت و وتواجہی نا پبی رکھ و ہر وڑنا پیشن نا جارحیت ناحالیت اٹ پورو واک اتون ورندی تننگ نا پکا عزم انا درشانی ءِ کرینے ۔ بنجائی کابینہ نا دیوان پنچ شنبے نادے آ وزیراعظم عمران خان نا کماشی ٹی اڈ ہلک، کابینہ بھارتی جارحیت نا پبی ورندی تننگ آ سلہہ بند فوج انا ستاءِ کرے ہرانا مسخت بھارت ءِ دا کلہو ءِ تروئی ئس کہ اگرچہ پاکستان لائخی تخک ولے او بے گناہ شاری تے نسخان تننگ یا بے جا نسخان اسے نا سوب مننگ نا ارادہ تخپک۔ کابینہ اسہ مدبر اسے نا حیثیت اٹ وزیراعظم عمران خان نا تران نا ستاءِ کرسا اومیت ظاہر کرے کہ بھارتی حکومت و سرکڑدہ ہی دانشمندی نا درشانی ءِ کیرہ تانکہ علاقائی امن ءِ گڑتی مون تروک مف۔ کابینہ امن و سوگوی نا بابت پاکستان نا پکا عزم انا اعادہ ءِ کرسا تینا علاقائی سالمیت و وتواجہی نا پبی رکھ ءِ کننگ و ہروڑنا پیشن نا جارحیت نا حالیت اٹ پورو واک اتون ورندی تننگ نا عزم انا ہم درشانی ءِ کرے۔ وزیر خارجہ شاہ محمود قریشی ساڑی حالیت آتیا کابینہ ءِ چین، سعودی عرب، ترکی ، ایران نا وزراء خارجہ و ایلو جہانی راہشون آتون تینا رابطہ غاتا بارواٹ معلومدار کرے۔ بنجائی کابینہ پاکستان نا اصولی موقف ءِ تالان کننگ و بے چیٹی تے کم کننگ نا کوشست آتا بابت وزیر خارجہ و وزارت خارجہ امور نا کوشست آتا ہم ستاءِ کرے۔
