پاکستان و چین ءِ دیکی ریل روٹ ایم ایل ون و ٹوپر ٹریک ءِ گچین کننگ کن ترندی اٹ کاریم کننگ نا گرج ءِ، شیخ رشید احمد
اسلام آباد۔ 28 فروری (اے پی پی) بنجائی وزیر ریلوے شیخ رشید احمد پارینے کہ گوادر پورٹ ڈٹ ڈیہہ ٹی انقلابی شونداری نا ضامن مریک، پاکستان و چین ءِ دیکی ریل روٹ ایم ایل ون و ٹوپر ٹریک ءِ گچین کننگ کن ترندی اٹ کاریم کننگ نا گرج ءِ۔ پنچ شنبے نادے آ چین نا سفیر یاؤجنگ وزیر ریلوے شیخ رشید احمد تون اوڑدہی کرے۔ اوڑدہی ٹی پاکستان و چین نا نیام اٹ جاری ریل ڈٹ آتیا گپ و تران کننگا و ڈٹ آتیا کاریم نا رفتار ءِ ترند کننگ آ ہیت وگپ کننگا۔ پشاور۔ کراچی ٹی لائن ون (ایم ایل ون) ڈٹ انا ڈیزائن سٹڈی ءِ زوت پورو کننگ آ ہم گپ و تران کننگا۔ 1800 کلومیٹر ریل ٹریک ڈٹ آ کم و ود ہشت ارب ڈالر خڑچ بریک پنچ سال اٹی پورو مریک۔ شیخ رشید احمد پارے کہ است خواہی ءِ کہ وزیراعظم پاکستان عمران خان نا بروک آ دورہ چین اٹی ایم ایل ون ڈٹ آ گڈیکو معاہدہ پک مرے۔ اوپارے کہ ایم ایل ون ڈٹ پاکستان ریلوے و ملکی معیشت کن بے کچ اہم ءِ، چینی شریداری ءِ ایلو ریل ڈٹ آتے ٹی ہم اولیت ایتنہ۔ وزیر ریلوے چینی ریل کمپنی تے کوئٹہ، زاہدان و تفتان (ایران) ریل لین نا اپ گریڈیشن اٹی شریداری نا سلہ ہم خلک۔ اوپارے کہ پاکستان و چین ءِ دیکی ریل روٹ ایم ایل ون و ٹوپر ٹریک ءِ گچین کننگ کن ترندی اٹ کاریم کننگ نا گرج ءِ۔ دیکی روٹ ریل ڈٹ آتا زوت پوروی آن ہمسایہ ملک چین، اوغانستان ، ایران و سینٹرل ایشین ملک آتے ٹی ریل لنک اس جوڑ مریک۔ گوادر پورٹ ڈٹ ڈیہہ ٹی انقلابی شونداری نا ضامن مریک۔ چینی سفیر یاؤ جنگ پارے کہ پاکستان نا اقتصادی شونداری کن روڈ و ریل انفراسٹرکچر ءِ ترندی اٹ شون تننگ المی ءِ۔ دا چرجوئی ٹی پاکستان ریلوے تون پورو کمک کینہ۔
