سعودی وزیر خارجہ ولی عہد نا اہم ءُ کلہو اس اتسا پاکستان آ بننگ ءِ، وزیر خارجہ شاہ محمود قریشی
اسلام آباد۔ 28 فروری (اے پی پی) وزیر خارجہ شاہ محمود قریشی امریکی صدر ڈونلڈ ٹرمپ نا بیان نا ستاءِ کرسا پارینے کہ پاکستان نا امریکہ تون متکن ءُ تعلقداری ءُ، امریکہ نا نیام تمنگ ڈیہہ ٹی امن و ایمنی کن کمکار مننگ کیک۔ خوشی ءِ کہ صدر ٹرمپ حالیت آتا سنگینی نا جاچ ءِ ہلسا نیام تمنگ نا فیصلہ ءِ کرینے۔ پنچ شنبے نادے آ وزیراعظم عمران خان نا کماشی ٹی کابینہ نا دیوان آن پد میڈیا تون گپ و تران کرسا وزیر خارجہ پارے کہ وزیراعظم عمران خان و کابینہ گچین ءُ خارجہ پالیسی اس تینا کننگ و دابے چیٹ حالیت آتے ٹی گچین سفارت کاری آوزیر خارجہ و وزارت خارجہ ءِ مبارکباد پیش کرینے۔ اوپارے کہ نن صدر ڈونلڈ ٹرمپ انا بیان نا ستاءِ کینہ۔ کنے خوشی ءِ کہ صدر ٹرمپ حالیت آتا سنگینی نا جاچ ءِ ہلسا نیام تمنگ نا فیصلہ ءِ کرینے۔ وزیر خارجہ پارے کہ پاکستان نا امریکہ تون تعلقداریک بھاز متکن ءُ امریکہ نا نیام تمنگ ڈیہہ ٹی امن و ایمنی کن کمکار مننگ کیک۔ اسہ سوج اسے نا ورندی ءِ ترسا اوپارے کہ شام اتون کنا سعودی عرب نا وزیر خارجہ تون ہیت مس و او پاکستان آ بننگ نا است خواہی نا درشانی ءِ کرے ہرادے ای بخیر اٹ پاریٹ وخت اس کہ (اینو) سعودی وزیر خارجہ ولی عہد نا اہم ءُ کلہو اس اتسا پاکستان آ بننگ ءِ۔ نن تو اولیکو دے آن پاننگ اُن کہ نن امن نا داعی اُن۔ نن بنائی دے آن پاننگ اُن کہ ہندوستان نا کنڈآن ڈیہہ ٹی بے چیٹی ودی کننگ نا کوشست سیاسی مسخت آتا رداٹ ءِ۔ وزیر خارجہ پارے کہ داسہ تو بی جے پی نا لیڈر تینٹ مننگ ءِ کہ پاکستان نا دنگ اٹی چاگڑدی جلہو آن ننے لوک سبھا ٹی 22نشست زیات ملنگ نا گمان ءِ۔
