اسلام آباد۔27فروری (اے پی پی ) صدر ڈاکٹر عارف علوی ءَ گوں سندھ ءَ چہ سیادی داروکیں راجی اسمبلی ءِ باسکاں چارشمبے ءِ روچءَ مزن گسءَ آئیءِ چمیبر ءَ گند ءُ نندکتگ۔ ایوان صدرءِ نیمگءَ چہ جاری بیان ءِ ردءَ راجی اسمبلی ءِ باسکاں صدرءَ را سندھ ءَ جاری دیمروئی منصوبہ آنی ہوالگءَ سرپد کتگ ءُ ایشانی تہءَ لھتیں منصوبہ مھتلی ءِ آماچ اَنت، ایشانی تہءَ کراچی ءِ گرین لائن ، ریڈ لائن، صفائیءَ ہوار بازیں منصوبہ ہوار اَنت۔ اے موہ ءَ صدر ڈاکٹر عارف علوی ءَ گشتگ کہ آ سندھ حکومت ءَ گوں اے منصوبہ آں زوتاں چہ زوت سرجم کنگءِ ہوالگءَ گپ کنت۔ آئیءَ گشتگ کہ اے منصوبہ آنی سرجم کنگءَ سندھ ءَ را بنجاہی حکومت کمک کنت۔ آئیءَ گشتگ کہ آ سندھ حکومت ءَ گوں گپ کنت کہ راجی اسمبلیءِ باسکانی حلقہ آں جاری دیمروئی منصوبہ آں سرجم کنگءَ کمک بہ کنت۔
