اسلام آباد۔ 27 فروری (اے پی پی) امریکی محکمہ درئی کار ءَ پاک۔بھارت کشاں چیل آنی سرءَ دلرنجی ءُُ نہ وشی ءِ درشان کنان ءَ دوئیں ملک آنی اُردئی کاروائی ءَ چہ دست کشئی ءُُ استیں کشاں چیل آناں کم کنگ ءِ سر ءَ زور داتگ۔ چار شمبے ءِ روچ ءَ اسلام آباد ءَ امریکی سفارتخانہ ءَ امریکی وزیر درئی کار پومپیو ءِ بیان جاڑی کتگ ایشی ءِ تہ ءَ امریکی وزیر ءِ درئی کار ءَ گوشت کہ بھارت ءِ نیمگ ءَ 26فروری ءَ کاروائی آں چہ پد بھارتی وزیر ءِ درئی کار سشما سوراج ءَ گوں رابطہ کنان ءَ سلامتی کار آنی پڑ ءَ وتی نزیکیں کمک ءُُ ایمنی ءِ برجائی ءُُ دمگی سلامتی ءِ یکجائی ءِ سر ءَ زور پر دات۔ من پاکستانی وزیر درئی کار ءَ گوں گپ ءُُ تران کت ءُُ اُردی کاروائی ءَ چہ دست کشی کنگ ءُُ استیں کشاں چیل ءَ را کم کنگ ءَ را ترجی دیگ ءِ سر ءَ زور پر دات۔ پومپیو ءَ گوشت کہ من دوئیں وزیر ءِ درئی کار آناں گوشتگ کہ ما بھارت ءُُ پاکستان ءَ را سبر ءُُ اوپار کشی کنگ ءُُ کجام رنگ ءَ کشاں چیل آناں ودینگ ءَ چہ وت ءَ پھریزگ ءِ دلبڈی ءَ کناں۔ آئی ءَ گوشت کہ من دوئیں وزیر آناں ایش سر ءُُ سوج ھم کتگ کہ آ وت مہ وت ءَ یک شل ءَ روگ ءُُ آیگ ءَ ترجی بدینت ءُُ گیش اُردئی کاروائی ءَ چہ وت ءَ بہ پھریز آں۔
