پاک فضائیہ کنٹرول لین آ 2 بھارتی جہاز آتے خلک بٹے، اسہ بھارتی پائلٹ اس دزگیر
اسلام آباد۔ 27 فروری (اے پی پی) پاک فضائیہ چارشنبے نادے آ لین آف کنٹرول آ غیر فوجی ہدف آتے نشانہ جوڑ کرسا پاکستانی چاگڑدی دنگ اٹ 2بھارتی جہاز آتے خلک بٹے۔ دا ہیت ءِ دفترخارجہ و پاک فوج انا ترجمان پارے۔ ڈی جی آئی ایس پی آر میجر جنرل آصف غفور نا ٹویٹ نا رداٹ پاک فضائیہ پاکستانی چاگڑدی دنگ انا تہہ ٹی 2 بھارتی جہاز آتے خلک بٹے ہرافک لین آف کنٹرول ءِ کراس کریسر۔ اوپارے کہ اسہ جہاز اس آزاد کشمیر نا تہہ ٹی وخت اس کہ ایلو مقبوضہ کشمیر اٹی تما۔ ہمووخت آ ساڑی پاک فوج اسہ بھارتی پائلٹ اسے دزگیر کرے۔ داکان بیدس ترجمان دفتر خارجہ نا کنڈان جاری بیان نار داٹ پاک فضائیہ چارشنبے نادے آ پاکستانی چاگڑدی دنگ انا تہہ آن لین آف کنٹرول آ کارروائی کرے۔ دا گام گیج بھارتی جارحیت نا ورندی ٹی الوکہ ہنداخاطران پاکستان انسانی و ضمنی نسخان آن پاناد کرسا غیر فوجی ہدف ءِ نشانہ کرے ہرانا اسٹ انگا مسخت تینا دفاع کن تینا حق، عزم و لائخی تے نشان تروئی ئسک۔ بیان اٹی پاننگاسس کہ نن بے چیٹی تیٹی ودکی نا ارادہ تخپنہ ولے اگہ ہنداوڑنا رویہ نا کمک اٹ بیوس کننگا تو داوڑکننگ کن پورو وڑاٹ تیار اُن۔ ہندا سوب ءِ کہ نن پیدوار وارننگ ترسا و دے انا روشنائی ٹی کارروائی کرین۔ تدوک آ منہ سال آن بھارت اسہ بہانہ سے اٹ جارحیت نا کارروائی کننگ کن اودے ’’نیونارمل‘‘ نا نام نہاد اصطلاح نا پن تننگ نا کوشست کننگ ءِ۔ بیان اٹی پاننگاکہ اگہ بھارت شاہدی تے پیش کننگ آن بید س نام نہاد دہشت گرد آتا مخ تف آتیا جلہو کننگ ءِ تو نن ہم ہمو عنصر آتا برخلاف ورندی کارروائی کننگ نا حق تخنہ ہرافتے پاکستان اٹی دہشت گردی نا کارروائی کننگ کن بھارتی سرپرستی دوئی ءِ۔ نن دا کسر ءِ ہلنگ نا خواہندار افن و ننا خواہش ءِ کہ بھارت امن ءِ موقع اس ایتے و اسہ پکا ءُ جمہوری قوم اسے آنبار ویل آتے ایسر کے۔
