پاک فوج انا ترجمان نا اِرابھارتی جنگی جہاز آتے خلنگ و بٹنگ، 2بھارتی پائلٹ آتا دزگیری پک
راولپنڈی۔ 27 فروری (اے پی پی) پاک فوج انا ترجمان میجر جنر ل آصف غفور اِرابھارتی جنگی جہاز ءِ خلنگ و بٹنگ و 2 بھارتی پائلٹ آتا دزگیری ءِ پک کرسا پارینے کہ پاک فضائیہ تینا دنگ اٹ سلسا بھارت نا 4ہند آتیا 6سٹرائیک کرے، پائلٹ آک فوجی ہدف و سپلائی ڈپوزآتے نشانہ کرسا لاک کریر و ولدا رکھوک ءُ فاصلہ و ملوک ءُ جاگہ سے آ اسٹرائیک کریر، پاک فضائیہ اگہ لاک کروک آ ہدف آتے نشانہ کریکہ تو جانی نسخان مسکہ ولے اسہ مہذب و کسبی فوج اس مننگ نا ناطہ پاک فضائیہ ہدف آتا نشانہ کننگ نا باوجود بھس کتو، پاکستان پرامن ءُ ملک اسے ولے بھارت ءِ ورندی تننگ آن بیدس ہچ ءُ چارہ اس الوکہ، مچ آ آپریشن اٹی پاک فضائیہ ایف 16جہاز آتے کاریم اٹ اتتو تو بھارت نا کنڈان ایف شانزدہ جہاز آتا خلنگ و بٹنگ نا دعوایٰ ہمہ درست مننگ کیک، پاکستان نا فوج اتون لائخی، واک و الس تون ہروڑنا گڑاارے، نن زموار مننگ خوانہ و جنگ انا کنڈا ہِننگ خواپنہ، وزیراعظم پاکستان و الس ہم امن نا کلہو ءِ تسر ، نن ہر دروشم اٹ ڈیہہ ءِ جنگ انا کنڈا دننگ خواپنہ۔ ڈی جی آئی ایس پی آر میجر جنرل آصف غفور میڈیا ءِ احوال ترسا پارے کہ سہب آن لین آف کنٹرول آ گڑاس سرگرمی چلینگ انگ ءِ ہرادے مون آتخسا پاک فضائیہ تینا ٹارگٹ ءِ ہلنگ آن مست فیصلہ کرے کہ ہچ ءُ ملٹری ہدف ءِ ہَلنگپک ، ارٹ میکو فیصلہ کرے کہ ٹارگٹ اٹی ہچ ءُ انسانی زند اسے نا نسخان مف، ننا دا فیصلہ نا مسخت دائس کہ ننتون ورندی لائخی ارے ولے دُن ءُ ہچ ءُ کاریم اس کننگ خواپنہ ہراننے غیر زموار کے۔ میجر جنرل آصف غفور نا پاننگ ئس کہ پاک فضائیہ بھمبر گلی، کے جی ٹو و ناریان نا علاقہ ٹی ڈپوتیا ٹارگٹ لاک کرے و نن رکھوک ءُ فاصلہ اس تخسا ہدف ءِ نشانہ کرسا جم وڑاٹ 6سٹرائیک کننگا، ہرافتا مسخت دا ئس کہ نن ہروڑ کننگ کینہ ولے دا ڈیہہ نا امن ءِ خراب کننگ خواپنہ ، نن زموار مننگ خوانہ، بے چیٹی خواپنہ، نن جنگ انا کنڈا ہِننگ خواپنہ، وزیراعظم و الس ہم امن نا کلہو ءِ تسر و نن ہچ ءُ حالیت اسے اٹ دا ڈیہہ ءِ جنگ انا کنڈا دننگ خواپنہ۔ اوپارے کہ ہراتم پاک فضائیہ ہدف ہلک اوکان پد بھارتی فضائیہ نا 2جہاز اسہ وار ولدا ایل او سی نا خلاف ورزی ءِ کرسا ننا کنڈابسر ، ننا فضائیہ تیار ئس ہراٹی ہڑتوم آ بھارتی جہاز آک تمار ہرافتیان اسہ جہاز اس ننا و ایلو اوفتا کنڈا تما، داکان بیدس ہم اسہ جہاز اسے نا تمنگ نا حوال ءِ ولے اوڑتون ننا انگیجمنٹ متنے۔ ترجمان پاک فوج اِرابھارتی پائلٹ آتا دزگیری ءِ پک کرسا پارے کہ بھارتی پائلٹ آتون مہذب ملک آنبار سلوک کرین ، اسہ ٹھپی پائلٹ ءِ سی ایم ایچ آ گدریفین و ایلو ننا حراست اٹی ءِ، پائلٹ آتیان گڑاس دستاویز ہم ملانے۔ اوپاکستان نا ایف سولہ جہاز ءِ بٹنگ نا بھارتی دعویٰءِ ہم مسترد کرے و پارے کہ پاکستان دا جنگ اٹی ایف 16 ءِ کاریم اٹ ہی اتتنے۔ ہنداخاطران پاکستان نا ہچ ءُ جہاز اسے بِٹنگتنے، اوپارے کہ پاکستان نا سلہہ بند فوج و پاک فضائیہ تون ورندی آن بیدس ہچ ءُ چارہ اس الوکہ، ولے ورندی ءِ ہمہ تننگاکہ ، انت مگے ہمووڑاٹ ہراوڑ کہ بھارت تس یا ہمووڑ ہرا اسہ زموار ملک اسے نا مریک۔ نن زموار ءُ ریاست اسے اُن و امن خوانہ، نن زمواری نا شاہدی ءِ تسن و تینا ٹارگٹ ءِ پورو کرین ہرانا مسخت دا ئس کہ نن ہروڑ کننگ کینہ ولے ڈیہہ نا امن نا سوب آن کننگ خواپنہ۔ ڈی جی آئی ایس پی آر پارے کہ ہڑتوم آ ریاست آتون لائخی ارے ولے بھارت ءِ پہہ مننگ نا گرج ءِ کہ جنگ بیرہ پالیسی تا بے سہبی ءِ ، نن داسہ ہم بڑھاوا تننگ خواپنہ، نن امن نا کسر آ ہِننگ خوانہ، اگہ نی پاسہ کہ تینا خلقت ءِ تعلیم، جان جوڑی و روزگار تننگ نا گرج ءِ تو ولدا ہیت وگپ کر، جنگ ویل آتا ایسری اف، دنیا ٹی ہچ ءُ ویل اس جنگ اٹ ایسر متنے۔ بھارت ءِ بایدے مرے ننا پیشکش آ خوڑتی اٹ سجفے و ہرے کہ نن ہرانگ ہِننگ خوانہ۔ اوپارے کہ ہراوڑ نا جتا ءُ ورندی تسن ہنداوڑ پاکستانی میڈیا ہم امن نا صحافت کرے، نن تینا دفاع ٹی ایکشن کرین، میڈیا غان خواست ءِ کہ امن نا کسر کن رپورٹ کیر، اگہ جنگ مسلط کننگا تو ہمووخت نا رپورٹنگ جتا مریک، ننے ریاست پاکستان، حکومت پاکستان و لائخ فوج انا وڑاٹ امن نا کلہو ءِ تروئی ءِ ، نن کلہو تسونن کہ لائخی مننگ آن پد ہم نن امن نا کنڈا ہِننگ خوانہ ، اگہ ننے آ جارحیت مسلط کننگا تو نن ورندی ایتنہ۔ اوپارے کہ بھارت ایل او سی نا خلاف ورزی ءِ کرے، ورندی تننگ آن بیدس ہچ ءُ چارہ اس الوکہ۔ نن زموار ءُ ملک و امن خوانہ، جنگ دنیا نا ہچ ءُ ویل اسے نا ایسری اف۔
