اقوام متحدہ ٹی پاکستان نا آخبتی مندوب نا اقوام متحدہ نا کمامدار وسفارت کار آتون اوڑدہی، بھارتی جہاز آتاکنڈان کنٹرول لین نا خلاف ورزی آن معلومدار کرے
اقوام متحدہ۔ 27 فروری (اے پی پی) اقوام متحدہ ٹی پاکستان نا آخبتی مندوب ڈاکٹر ملیحہ لودھی تدوک آ دے کیہی سفارت کار و اقوام متحدہ نا کمامدارآتون سرجم اوڑدہی کرینے و اوفتے لین آف کنٹرول (ایل او سی) نا بھارتی جہاز آتا خلاف ورزی و جارحیت آن معلومدار کرے۔ اقوام متحدہ ٹی پاکستان نا کنڈان بے کچ اہم ءُ کلہو اس پیدوار وڑاٹ پیش کرسا اوپارے کہ بھارت نا جارحیت نا ورندی ٹی پاکستان ورندی ایتک ولے دا بابت وخت و جاگہ نا تعین ءِ نن تینٹ کینہ۔ اوپارے کہ ہڑتوم آ ملک آتا تین پہ تینی حالیت آک بے چیٹ مننگ آن پد ہم بھارت جارحیت نا درشانی ءِ کرینے۔بھارتی جارحیت نا ورندی ءِ تننگ نا بابت بی بی سی ریڈیو ءِ اسہ سوج اسے نا ورندی ٹی اوپارے کہ نن پدی مفنہ۔ پاکستانی سفیر پارے کہ 14فروری آ پلوامہ واقعہ غان پد پاکستان نا وزیراعظم عمران خان عمل نا قابل شاہدی تیا جاست وپاست نا سلہ خلکوسس داکان بیدس وزیراعظم مذاکرات نا ہم سلہ خلک ولے بھارت اقوام متحدہ نا چارٹر نا خلاف ورزی ءِ کرسا پاکستان آ جلہو کرے ہرا جہانی کانود نا ہم خلاف ورزی ءِ۔ اوپارے کہ بھارت نا دا گام گیج آن جہانی امن و سلامتی ءِ گڑتی مون تروک ءِ۔ اومستی پارے کہ چیلنج آتا مقابلہ ءِ کننگ کن ملک آتا ردعمل انت مریک دا اوفتیا ٹی ءِ۔ پاکستانی سفیر پارے کہ پاکستان مدام امن و سلامتی نا ہیت ءِ کرینے و ویل آتا چٹفنگ ءِ مذاکرات اٹ خواہک ولے دا بابت بھارت نا رویہ فریشانی اسے۔ او جیش محمد نا کیمپ ءِ بھس کننگ نا بابت بھارتی دعویٰ تے مسترد کرسا پارے کہ حالیت آک خراب مننگ ءُ۔ دا بابت پاکستانی سفیر جہانی برادری آ زور شاغاکہ او حالیت آتے پین خراب مننگ آن بچفنگ کن تینا کڑد ءِ ادا کے۔ اوپارے کہ مقبوضہ کشمیر اٹی بیدادی نا واقعہ غاتا بنداوی سوب بھارت نا کنڈان کشمیری تا حق خودارادیت نا پدریسہ نفی ءِ ۔ اوپارے کہ وزیر خارجہ مخدوم شاہ محمود قریشی نا کنڈان اقوام متحدہ نا سیکرٹری جنرل ءِ نوشتہ کروک آ چھٹی ءِ اونا دفتر آ سرکننگانے انتئے کہ ہمووخت آ او سفر اٹی ئس۔ ہنداوڑ اقوام متحدہ نا سلامتی کونسل نا صدر آن بیدس ایلو سفارتی حلقہ غاتسکان ہم سرکننگانے۔ اوپارے کہ پاکستان نا درخواست آ داچھٹی ءِ سیکورٹی کونسل نا دستاویز نا وڑاٹ بشخ وپانٹ کننگانے۔ پاکستانی سفیر اسلامی ملک آتا تنظیم(او آئی سی) نا سفارت کار آتون ہم اوڑدہی کرے و بھارتی گام گیج نا مذمت نا بابت پاکستان نا موقف ءِ اوفتسکان سرکرے۔ وائس آف امریکہ تون گپ و تران کرسا اوپارے کہ پاک بھارت بے چیٹی نا بابت پاکستان نا وزیر خارجہ (چارشنبے نادے ) آ اقوام متحدہ نا سیکرٹری جنرل تون فون آ گپ و تران کیک۔ ملیحہ لودھی پارے کہ نن دا ہیت انا انتظار ءِ کینہ کہ سیکرٹری جنرل ہراوڑ سرکڑدہ ہی نا درشانی ءِ کرسا ڈیہہ نا امن و سلامتی ءِ زہمی مننگ آن بچفک۔ نن جہانی برداری ءِ پارینن کہ بھارت نا دراندازی و جارحیت آن ڈیہہ نا امن و سلامتی ءِ گڑتی مون تروک ءِ۔ ملیحہ لودھی پارے کہ بھارتی جارحیت و جارحانہ رویہ غان پد داسہ نن دا نتیجہ غا سرمسونن کہ پاکستان ءِ تینا دفاع نا پورو حق دوئی ءِ و نن تینا مرضی نا رداٹ اونا ورندی کن وخت و جاگہءِ گچین کینہ۔ میڈیا نا سوج آتا ورندی ٹی پاکستانی سفیر پارے کہ بھارت ’جس کی لاٹھی اس کی بھینس‘ نا کانود نافذ کننگ خواہک و اگہ اودے توننگتو تو مچ آ دنیا ٹی جنگل نا کانود مننگ کیک۔ جیش محمد و ایلو پڑک آتا بارواٹ پاکستانی سفیر پارے کہ اوفیتا پاکستان اٹی پابندیءِ و پاکستان دہشت گردی نا برخلاف برسر پیکار ءِ۔ اوپارے کہ پاکستان تینٹ دہشت گردی آن زہمی ءُ ملک اسے۔
