اسلام آباد۔ 27 فروری (اے پی پی) وزیراعظم نا خصوصی کمکار اوورسیز پاکستانی و انسانی وسیلہ ذوالفقار بخاری تون پاکستان اٹی سویلی کوریا نا سفیر کواک سنگ کیو اوڑدہی کرے۔ کورین سفیر خصوصی کمکار ءِ کوریا نا ہندی صنعت اٹی پاکستانی افرادی واکدار نا مانگ انا چرجوئی ٹی سویلی کوریا ٹی مروک آ ساڑی آ پیش رفت آن معلومدار کرے۔ اوپارے کہ خصوصی کمکار تون اواری اٹ کاریم کننگ اٹ کورین حکومت پاکستانی افرادی واکدار نا کوٹہ ٹی 11 درسد ودکی کرینے۔ دا چرجوئی ٹی ارٹ میکو مزل ملازم پرمنٹ سسٹم (ای پی ایس) ٹی قابل است جم بدلی ءِ۔ اوخصوصی کمکار ءِ معلومدار کرے کہ کوریائی حکومت پاکستان نا زیات افرادی واکدار دوئی کننگ نا گرج ءِ امنا کیک۔ پاکستانی ملازم آتا کوریائی زبان آ عبور و کاریم آگرفت ستاکڑزک۔ کورین سفیر ذوالفقار بخاری ءِ کوریا نا دورہ ءِ کننگ نا سلہ خلک۔ خصوصی کمکار کوٹہ ءِ ودفنگ آ کورین سفیر نا منت واری ءِ ہرفے و پارے کہ کوٹہ ءِ پین ودفنگ کن زوت کوریا نا دور ہ ءِ کیک۔ اومستی پارے کہ کوریا تون کمکاری نا پوسکن ءُ دور بناکننگ ءِ، ننا غٹ آن بھلا اولیت پاکستانی تیکن روزگار نا وارخواہی ودی کننگ نا ءِ و نن تینا مسخت اٹی سرسہبی دوئی کننگ اُن۔
