اسلام آباد۔ 26فروری (اے پی پی) قومی سلامتی کمیٹی بالاکوٹ نا خڑک آ مبینہ دہشت گرد کیمپ ءِ ہدف جوڑ کننگ و بھلو جانی نسخان اسے نا بھارتی دعویٰ تے یکسر مستردکرسا پارینے کہ اسہ وار ولدا بھارتی حکومت ناعاقبت اندیش خودساختہ، فرضی و دروغ نا دعویٰ تا سیبو ءِ ہلکونے۔ بھارت بے سوب جارحیت نا ارتکاب کرینے و پاکستان ورندی کارروائی کن وخت و جاگہ نا تعین ءِ تینٹ کیک۔ سلہہ بند فوج و پاکستان نا الس ہروڑنا حالیت آتے کن تیار مریر ، قومی سلامتی کمیٹی نا خصوصی دیوان وزیراعظم عمران خان نا کماشی ٹی سے شنبے نادے آ وزیراعظم آفس اٹی اڈ ہلک ہراٹی وزراء خارجہ ، دفاع، خزانہ ، چیئرمین جوائنٹس چیفس آف اسٹاف کمیٹی، چیف آف آرمی اسٹاف، چیف آف نیول اسٹاف، پاک فضائیہ نا سروک و ایلو سول عسکری کمامدارآک ساڑی ئسر۔ وزیراعظم آفس نا کنڈان جاری بیان اٹی پاننگانے کہ دا گام گیج ءِ بھارت اٹی گچین کاری چاگڑد کن کننگا ہرا ڈیہہ نا امن و سوگوی ءِ سنگین ءُ خطرہ سے آن دوچار کرینے۔ ہرا علاقہ ٹی جلہو نا دعویٰ ءِ کننگانے او دنیا کن ملوک ءِ تانکہ او راستکی تے چار۔ داڑکن ملکی و جہانی ذرائع ابلاغ ءِ دا ہند آ دننگ انگ ءِ۔ دیوان اٹی پاننگاکہ بھارت بے سوب جارحیت نا ارتکاب کرینے، پاکستان ورندی کارروائی کن وخت و جاگہ نا تعین ءِ تینٹ کیک۔ قوم ءِ پت اٹی ہلسا حکومت پارلیمنٹ نا اسیجا دیوان اس بٹنگ انگ نا فیصلہ کرینے۔ وزیراعظم 27 فروری 2018 ء آ نیشنل کمانڈ اتھارٹی (این سی اے) نا خصوصی دیوان ءِ بٹنگانے۔ وزیراعظم پارت کرے کہ سلہہ بند فوج و پاکستان نا الس تون اوار قومی واک انا عنصر آک ہروڑناحالیت آتے کن تیار مریر۔ اوڈیہہ ٹی بھارت نا غیر زموارانہ پالیسی تے پاش کننگ کن جہانی سرکڑدہ غاتون رابطہ نا ہم فیصلہ کرے۔ وزیراعظم جان و مال نا نسخان آن بیدس بھارتی کوشست ءِ پسپا کننگ کن پاک فضائیہ نا وخت آ و گچین ورندی کارروائی نا ستاءِ کرے۔
