صدر مملکت ڈاکٹرعارف علوی نا’’انٹرنیشنل کانفرنس آن میڈیا اینڈ کنفلیکٹ ‘‘ نا بنائی دود آن تران

اسلام آباد۔ 26 فروری (اے پی پی) صدر مملکت ڈاکٹرعارف علوی پارینے کہ پاکستان نا سلہہ بند فوج تینا سوگو عزم ، کسبی چاہنداری و آزموندہ غاتا لحاظ اٹ غٹ آن مون آٹے و او لمہ وطن آ ہچ ءُ آنچ اس بننگ کن الیپسہ، نن ایلو ملک آتا برخلاف جارحانہ عزم تخپنہ ولے تینا ملک انا دفاع ءِ جوانی اٹ کننگ چانہ۔ او سے شنبے نادے آ بحریہ یونیورسٹی اسلام آباد اٹی ’’انٹرنیشنل کانفرنس آن میڈیا اینڈ کنفلیکٹ ‘‘ نا بنائی دود آن تران کریکہ۔ کانفرنس نا بست و بند ءِ وزارت اطلاعات و نشریات نا ’’پاکستان پیس کولیکٹو‘‘ نا کنڈان کننگاسس۔ صدر مملکت پارے کہ راج آتے ٹی چندی جھیڑہ غاک ودی مریرہ کارہ ، و دا جھیڑہ غاتے ایسر کننگ اٹ میڈیا نا کڑد بھاز اہم ءِ۔ اوپارے کہ بھارتی میڈیا نا کنڈان سیم آ اشتعال نا کیفیت ودی کننگ انگ ءِ ہرا گڑتی نا سوب مننگ کیک۔ اوپارے کہ دہشت گردی نا واقعہ بھارت نا تہہ ٹی مریک و اونا دوبہ ءِ پاکستان آ خلنگک، ہرا بے سوب ءِ۔ صدر مملکت پارے کہ وزیراعظم عمران خان دا حالیت آتے ٹی پیدوار کلہو اس تسنے کہ پاکستان امن خواہک و دا پاکستانی الس نا توار ءِ۔ او دوٹوک لوز آتے ٹی پارے کہ پاکستان سلہہ بند فوج انا عزم بھاز سوگو ءِ ، دا تینا آزموندہ و کسبی لائخی تا لحاظ اٹ دنیا ٹی غٹ آن مون آٹی ءِ و ملک آ ہچ ءُ آنچ اس بننگ کن الیپنہ۔