اسلام آباد۔ 26 فروری (اے پی پی) وزیر خارجہ مخدوم شاہ محمود قریشی پارے کہ بھارت ڈیہہ ٹی امن و ایمنی ءِ شیف و بڑز کننگ اٹ لگوک ءِ ، پاکستان نا چنا چنا سوگو انگا دیوال آنبار ملک انا جغرافیائی سیم تا رکھ اکن تینا سلہہ بند فوج اتون ہم کوپہ سلوک ءُ ۔ او سے شنبے نادے آ وزارت خارجہ ٹی دیوان آن پد میڈیا تون گپ و تران کریکہ۔ داکان مست وزیر خارجہ مخدوم شاہ محمود قریشی نا کماشی ٹی ساڑی حالیت آتا رداٹ وزارت خارجہ ٹی ہلہلئی دیوان اس اڈ ہلک۔ دیوان اٹی مسکوہی خارجہ سیکرٹریز و سینئر سفارت کار آک بشخ ہلکونو۔ دا دیوان ءِ ساڑی آ حالیت آتیا سلابت کن بٹنگ انگا ہراٹی ساڑی آ حالیت و ڈیہہ ٹی امن و ایمنی نا بابت مرغن ءُ سلابت اس کننگا۔ دیوان آن پد وزیر خارجہ مخدوم شاہ محمود قریشی میڈیا تون گپ و تران کرسا پارے کہ پاکستان ڈیہہ ٹی امن و سوگوی نا خواہندار ءِ۔ اوپارے کہ بھارت ڈیہہ ٹی امن و ایمنی ءِ شیف و بڑز کننگ اٹ لگوک ءِ۔ وزیر خارجہ پارے کہ پاکستان نا چناچنا سوگو ءُ دیوال اسے آنبار ملک انا جغرافیائی سیم تا رکھ اکن تینا سلہہ بند فوج اتون ہم کوپہ تیار سلوک ءُ۔ اوپارے کہ پاکستان زموارانہ رویہ نا درشانی ءِ کرسا مون آ ہِننگ ءِ۔
