نیویارک۔ 26 فروری (اے پی پی) پلوامہ واقعہ غان پد بھارت نا گام گیج آتیان سویلی ایشیائی ڈیہہ نا امن ءِ بھلو گڑتی اس مون تروک ءِ، ہراڑان جہانی امن و سلامتی ہم بھاز بے وڑ زہمی مننگ کیک۔ اقوام متحدہ ٹی پاکستان نا آخبتی مندوب ڈاکٹر ملیحہ لودھی پارے کہ حالیت آک قابو آن پیش ہِننگ کیرہ۔ تدوک آ دے ترک ٹیلی ویژن نا پروگرام ’’نیوز میکر‘‘ اٹی اسہ سوج اسے نا ورندی ٹی اوپارے کہ وزیراعظم عمران خان بھارت ءِ مذاکرات نا سلہ خلکونے تانکہ امن و ایمنی ءِ بحال کننگ مرے۔ داکان بیدس پاکستانی سرکڑدہ 14 فروری نا واقعہ نا جاست وپاست نا ہم پیش کش کرینے۔ اوپارے کہ داحالیت آتا ورندی دوبہ یا شرہ آخا بلکن مذاکرات ءِ۔ اوپارے کہ پاکستان جلہو اٹی ہربابت اوار مننگ نا سختی اٹ تردید ءِ کرینے و وزیراعظم وعدہ کرینے کہ اگہ عمل نا قابل شاہدی ارے تو کارروائی کننگک۔ پاکستانی سفیر پارے کہ داہیت پیدوار ءِ کہ ہرا ملک امن خواہک و دیر اس کشمیر نا جھیڑہ نا پر امن و مذاکرات نا کمک اٹ ایسری نا است خواہ ءِ۔ اوپارے کہ بھارتی مقبوضہ کشمیر اٹی برانز نا بنداوی سوب کشمیری الس نا حق خودارادیت نا پدریسہ نفی ءِ۔ ملیحہ لودھی پیدوار کرے کہ نن کیہی دہائی آن ہُننگ اُن کہ بھارت ’جس کی لاٹھی اس کی بھینس‘ نا پالیسی آ عمل کننگ ءِ و اوٹی بے سہب مسنے۔ اوپارے کہ بھارت نا کنڈان اقوام متحدہ نا سلامتی کونسل نا قرارداد آتا پدریسہ خلاف ورزی و مقبوضہ وادی ٹی انسانی حق آتا لتاڑنگ آن حالیت آک خراب مننگ ءُ۔ پاکستانی سفیر پارے کہ بھارت مقبوضہ جموں و کشمیر اٹی پورو وڑاٹ بے سہب مسنے و ساڑی حالیت آتا زموار ہم ہمودے۔ اومستی پارے کہ سویلی ایشیا نا امن و سلامتی ءِ گڑتی مون تروک ءِ بلکن داڑان جہانی امن و سلامتی بھاز بے وڑ زہمی مننگ کیک۔ اوجہانی برادری آ زور شاغا کہ او تینا کڑد ءِ ادا کے تانکہ حالیت آتا مون ءِ توننگے ۔ اسہ سوج اسے نا ورندی ٹی جیش محمد و ایلو پڑک آتا بارواٹ اوپارے کہ پاکستان اٹی اوفتیا پابندیءِ و ننا ملک دہشت گردی نا برخلاف پدریسہ کارروائی کننگ ءِ۔ اوپارے کہ پاکستان دہشت گردی آن زیات زہمی ءُ ملک اسے۔ اوپارے کہ نن دہشت گردی آن بھاز انگا نسخان تے ہرفینن انتئے کہ دا حالیت آتے نن ودی کتویسن دانا سوب آتے ٹی کیہی علاقائی و جہانی عوامل آک اوار ءُ۔
