اسلام آباد۔ 26فروری (اے پی پی) پاکستان ایئر فورس پاکستان نا چاگڑدی دنگ اٹ نیام تمنگ نا بھارتی کوشست ءِ بے سہب کرے۔ آئی ایس پی آر نا ڈائریکٹر جنرل میجر آصف غفور تینا ٹویٹ اٹی پارینے کہ پاکستان ایئر فورس سے شنبے نا سہب اتون پاکستان نا چاگڑدی دنگ اٹ پترینگوک آ بھارتی جنگی جہاز آتے نرنگ آ بیوس کرے۔ میجر جنرل آصف غفور سہب انا 6:36 منٹ آ تینا ٹویٹ اٹی پارے کہ بھارتی جنگی جہازآک مظفر آباد سیکٹر آن لین آف کنٹرول ءِ عبور کرسا پاکستان نا چاگڑدی دنگ اٹ پترینگار۔ اوپارے کہ پاک فضائیہ نا وخت آ و گچین ردعمل اٹی بھارتی جہازآک نرنگ آ بیوس مسر و اشتافی ٹی تینا پے لوڈ ءِ بالاکوٹ نا خڑک آ بٹسا نرار۔ اوپارے کہ پے لوڈ انا تمنگ اٹ ہچ ءُ جانی و مالی نسخان اس متنے۔ سلہہ بند فوج انا ترجمان داکان مست سہب ءِ مڑدان 4:42منٹ آ تینا ٹویٹ اٹی پارے کہ بھارتی فضائیہ لین آف کنٹرول نا خلاف ورزی ءِ کرینے۔ پاکستان ایئر فورس وخت آ و گچین ردعمل نا درشانی ءِ کرے ہراڑا بھارتی جہاز آک پدی نرار۔ٹویٹ اٹی ڈی جی آئی ایس پی آر سرجم آتے گڈسراٹ جاری کننگ نا پارینے۔ پلوامہ ٹی بھارتی فوجی قافلہ غا اسہ ہندی ءُ ورناسے نا جلہو آن پد بھارت نا سیاسی و فوجی سرکڑدہ غاتا کنڈآن پاکستان آ جلہو نا دھڑکو تننگسا کرینے و پاکستان نا چاگڑدی دنگ اٹ بھارتی جہاز آتا پترینگ انگ و چاگڑدی دنگ انا خلاف ورزی دا دھڑکو تیان پد کننگانے۔ پلوامہ ٹی بھارتی فوجی دستہ غا ہندی ءُ ورناس مقبوضہ کشمیر اٹی بھارتی فوجی تا جاری بیدادی نا ردعمل نا وڑاٹ کریسس۔وزیراعظم عمران خان تدوک آ سے شنبے نادے آ تینا اسہ ٹی وی تران اسے ٹی بھارت ءِ خبڑدار (وارننگ) کریسس کہ او ہروڑنا غلطی آن پاناد کے۔ اوپاریسس کہ جنگ ءِ بناکننگ توآسان ءُ کاریم اسے ولے ولدا اوڑا ہچ کس نا کنٹرول مفک دادے ہراوڑ چٹفنگے۔ وزیراعظم عمران خان پیدوار وڑاٹ پارے کہ نن بھارت نا داوڑنا ہر حرکت نا ورندی ءِ تننگ کن بیرہ سجفپنہ بلکن نن پبی ورندی ءِ ایتنہ و نن تون ورندی تننگ آن بیدس پین ہچ ءُ آپشن اس مفک۔ وزیراعظم پارے کہ پاکستان بھار ت تون امن خواہک و پلوامہ واقعہ غان ہچ وڑنا فائدہ اس دوئی کننگ خواپک۔ اوہروڑنا شاہدی آ کمک نا پیش کش ہم کریسس ولے بھارتی میڈیا نا چندی رپورٹ آتا رداٹ لین آف کنٹرول آ بھارت بھلو کچ اسے ٹی فوجی سازو سامان و فوج ءِ گدریفینے و بھارتی گچین کاری تا وخت آ او پاکستان ءِ سبخ اس تننگ خواہک۔ چیف آف آرمی اسٹاف جنرل قمر جاوید باجوہ لین آف کنٹرول و ورکنگ باؤنڈری آ چندی فارمیشن تا دورہ ءِ کرے۔ دوشنبے نادے آ او ایئر ہیڈ کوارٹرز نا دورہ ءِ کرے و چیف آف ایئر اسٹاف ایئر چیف مارشل مجاہد انور خان تون بھارتی دھڑکو، پاکستان نا ردعمل و آپریشنل تیاری تیا گپ و تران کرے۔ ہڑتوم آ چیفک سلہہ بند فوج انا تیاری و تین پہ تینی اواری اٹ کاریم کننگ آ است جمی نا درشانی ءِ کریر وپاریر کہ پاکستان نا سلہہ بند فوج بھارت نا کنڈان کروک آ ہروڑنا جارحیت یا غلطی نا پبی ورندی تننگ کن پورو وڑاٹ تیار ءُ۔
