جدہ۔ 26 فروری (اے پی پی) آزاد جموں و کشمیر نا صدر سردار مسعود خان بھارتی فضائیہ نا جہاز آتا کنڈان لین آف کنٹرول ءِ کراس کرسا پاکستان نا چاگڑدی دنگ انا خلاف ورزی نا ترندی اٹ مذمت ءِ کرینے۔ سے شنبے نادے آ تینا اسہ مذمتی بیان اسے ٹی اوپارے کہ داوڑنا جارحیت نا حالیت اٹ پاکستان نا سلہہ بند فوج تینا گل زمین نا دفاع کن ہروڑنا حق تخرہ و پبی وڑاٹ اونا ورندی ءِ تننگ کیرہ۔ اوپارے کہ پاکستان تون اوار اوار آزاد جموں و کشمیر نا الس پاکستان نا سلہہ بند فوج اتون ہم کوپہ سلوک ءُ ہرا داوڑنا ہر جارحیت نا پبی ورندی تننگ کن ہروخت تیار ءُ۔اوپارے کہ داوڑنا حرکت آک بھارت نا تاریخ ءُ و او دافتیان مقبوضہ کشمیر اٹی انسانی حق آتا خلاف ورزی تیان دنیا نا چکار ءِ اسہ کنڈ کننگ نا کوشست کیک۔ اوپارے کہ جہانی برادری خاص کر اقوام متحدہ نا سلامتی کونسل ءِ ساڑی حالیت آتا چٹفنگ کن تینا کڑد ءِ بایدے ادا کروئی مرے تانکہ ڈیہہ ٹی ودوک آ بے چیٹی تے کم کننگ مرے۔
