اسلام آباد۔ 25 فروری (اے پی پی) بنجائی وزیر اطلاعات و نشریات چوہدری فواد حسین پارینے کہ اسلام آباد ہائی کورٹ نواز شریف نا طبی بنداو تیا ضمانت نا درخواست آ درست کانودی فیصلہ اس تسنے، اگہ طبی بنداو تیا ضمانت مننگ ءِ بنا کننگے تو ایمنسٹی اسکیم اس جوڑ مریک و نیمہ غا جیل آک خورک مریرہ، کیہی دہائی تیان اقتدار اٹی رہینگوک آ ک پارہ کہ ننا درمان ءِ پاکستان نا ہسپتال آتے ٹی آخا بلکن پیشن نا ملک آتیان کرفنگے، دا بیرہ پاکستان نا وزیراعظم مننگ خواہک، عدالتی فیصلہ غان پد ڈیل و ڈھیل انا اثر ہم زائل مسنے، کنا وزارت نا بدلی نا خبر تیان غٹ آن زیات خوشی مسلم لیگ ن والا تے ارے، ای وزیراطلاعات مریو یا مفر ولے کنا رفتار و احتساب نا عمل ہندن آن ہندن برجاسلک، کنے ہرا شرف ملانے او وزیراعظم عمران خان نا سوب آن ملانے، وزیراعظم امر کہ پاہک ای ہمون کیوہ، نیب کانود اٹی ترمیم نا مسخت دُز آتے کلین چٹ تننگ اف بلکن نیب ءِ پین فعال و سوگو جوڑ کننگ ناءِ ، بھارت ءِ پیش کش کینہ کہ او کشمیر نا ویل انا ایسری تون اسہ گام اس مون آ برے پاکستان اِراگام مون آ بریک، کشمیر بھارت نا بشخ الوکہ و نئے ارے و نئے مننگ کیک، امت مسلمہ اقوام متحدہ نا کنڈا ہُننگ ءِ کہ چوخت یو این او کشمیر نا ویل و فلسطین نا ویل آتا ایسری کن عملی گام اس ہرفک۔ او دوشنبے نادے آ پاکستان ہاؤس نا کنڈآن انٹرنیشنل کانفرنس آن تران و صحافی تتون ہیت وگپ کریکہ۔ اوپارے کہ سندھ انا ہسپتال خور شید شاہ نا سنگت و امیر آتے کن فائیو اسٹار ہوٹل و نیزگار آتے کن جہنم اسے، سندھ انا شاری سرکاری ہسپتال آتیا ہِننگ نا جوان ءِ کہ او اُراٹی ہی ٹیکہ خلفر۔ صدر آزاد جموں کشمیر مسعود خان ، ناروے نا مسکوہی وزیراعظم کیجل میگنی بونڈایوک، آل پارٹیز حریت کانفرنس نا کنوونیئر عبداللہ گیلانی حریت راہشون یاسین ملک نا اُرائی مشعال ملک، پاکستان ہاؤس نا ڈی جی اطہر جاوید، پاکستان ہاؤس نا بورڈ آف ڈائریکٹر ز نا چیئرمین مسکوہی چیئرمین جوائنٹ چیفس آف اسٹاف کمیٹی جنرل (ر) احسان الحق ئسک ہم تران کریر۔ داکان پد صحافی تتون گپ و تران کرسا بنجائی وزیر چوہدری فواد حسین پارے کہ اسلام آباد ہائی کورٹ مسکوہی وزیراعظم نواز شریف نا کنڈان طبی بنداو تیا ضمانت نا درخواست آ درست کانودی ءُ فیصلہ اس ترسا نواز شریف نا درخواست ءِ مسترد کرینے، کانود نا رداٹ داوڑ مننگ ہی کپک ، اسلام آباد ہائی کورٹ شرجیل میمن کیس ہم ہندا بنداو تیا مسترد کریسس۔ اوپارے کہ ایلو کیس آتیانبار دا کیس ہم ننا حکومت جوڑ کتنے ، چیئرمین نیب انا سرکڑدہ ہی ٹی نیب کرپشن کیس آتا جاست وپاست کننگ ءِ پاکستان تحریک انصاف نا حکومت تو نیب اٹی چپراسی اسکان بھرتی کرفتنے، ساڑی حکومت بیرہ نیب ءِ بے کنڈ ہلوک جاست وپاست کن چاگڑد فراوان کرینے۔ اوپارے کہ مسکوہی چیئرمین نیب قمر الزمان چوہدری و اونا ٹیم مسلم لیگ ن نا الائس مرسا کریر، ن لیگ دور اٹی گورنر اسٹیٹ بینک، نیشنل بینک و ایس ای سی پی نا سرکڑدہ منی لانڈرنگ اٹی شریدار ئسر۔اوپارے کہ پاکستانی الس نا ہم ہندا خواست ءِ کہ بھلا بھلا دُزک آک تہہ ٹی بایدے مریر۔ اینو نا احتساب نا عمل ءِ الس نا پبی مخ تفی دوئی ءِ۔بنجائی وزیر پارے کہ پنجاب نا سینئر وزیرءِ نیب دزگیر کرے ، ننے گڑتی ہم ئس ولے نن ادارہ نا برخلاف ہیت کتون۔ اسہ سوج اسے نا ورندی ٹی اوپارے کہ وزیراعظم عمران خان ہرا کمٹمنٹ تون حکومت اٹی بسوسس ہندا وڑ مون آ ہنسا کاہک۔ اسہ سوج اسے نا ورندی ٹی او پارے کہ نعیم الحق تون کنا جندی تعلقداری ءِ ، اونا پورو شرف ءِ کیوہ، بیرہ اصول نا ہیت اس کرینے، مشاہد اللہ و مریم اورنگزیب لگوک آ ڑا تیل شاغگپس، اینو کنا بدلی نا بابت ہراہیت آک چلینگ انگ ءُ اوفتے ٹی غٹ آن زیات خوشی مسلم لیگ ن ءِ مننگ ءِ اوفتے پاننگ خواوہ ای وزیر اطلاعات مریو یا مفر کنا رفتار و احتساب نا عمل ہنداوڑ برجاسلک۔ دود آن تران کرسا بنجائی وزیر اطلاعات و نشریات چوہدری فواد حسین پارے کہ کشمیری تے ہمو حق آتے تروئی مریک ہرا آجو ءُ ریاست اسے تننگک، پاکستان امن خواہک، مقبوضہ کشمیر اٹی بیدادی ءِ بند کروئی مریک۔ اوپارے کہ کشمیر بھارت نا بشخ ءِ و نئے وخت اس مننگ کیک۔ ریاستی رٹ انا مطلب دا مفک کہ تینا شاری تیا گولی چلیفنگے۔
