اسلام آباد۔25فروری (اے پی پی) حالءُ احیوال کاری ءُ شنگکاری ءِ بنجاہی وزیر چوہدری فواد حسین ءَ گشتگ کہ سرجمیں پی ٹی وی یک نیمگے ءَ اِنتءُ پی ٹی وی ءِ ایم ڈی یک نیمگے ءَ اِنت، 23روچ اِنت کہ پی ٹی وی ءِ ہیڈ کوارٹر بند اِنت ءُ ایم ڈی ہیڈکوارٹرءَ شت نہ کنت ، آئیءِ عہد گ ہلاس بوتگ، پہ نوکیں ایم ڈیءَ اشتہار ہم دیئگ بوتگ، اے ایم ڈی پی ٹی وی ءَ چہ وت دست کش بہ بیت۔ آ دوشمبے ءِ روچءَ پیمرا ہیڈ کوارٹر ءَ حالءُ احیوال کاری ءُ شنگکاری کمیٹی ءِ چیئرمین ءُ کمیٹی ءِ باسکانی نیمگءَ چہ پی ٹی وی ءِ مردماں گوں جیڑہءُ جنجالانی گیشءُ گیواری ءِ اوستءِ دیئگءَ پد حال درءَ گوں گپءُ تران کنگءَ بوتگ۔ پیمرا ہیڈکوارٹر ءَ پی ٹی وی ملازم آنی مزنیں کساسے ءَ پی ٹی وی ءِ ایم ڈی ءِ حلاپءَ زھرشانی کتگ۔ آہاں لوٹ کتگ کہ پی ٹی وی ءِ ایم ڈیءَ را زوتاں چہ زوت عہدگءَ چہ ایر کنگ بہ بیت۔ سینیٹءِ کمیٹی ءِ چیئرمین فیصل جاوید دیوانءَ پد کمیٹی ءِ باسکانی ہمرائیءَ زھر شانی کنوکیں مردمانی گورءَ شتگءُ آہانی گپے گوشداشتگ ءُ گشتگ کہ سینیٹءَ اے جیڑہ ءِ نیمگءَ دلگوشی کتگءُ دیوانءَ ہم ایشی ءِ سرءَ گپءُ تران بوتگ، حال ءُ احیوال کاری ءُ شنگکاری ءِ بنجاہی وزیر چوہدری فواد حسین ءَ ہم مزن وزیر ءَ را پی ٹی وی ءِ ملازم آنی جیڑہءُ جنجالانی گیشءُ گیوار کنگءِ نمدی نبشتہ کتگ۔کمیٹی ءِ باسک پیر صابر شاہءَ گشتگ کہ پی ٹی وی ملازم آنی زھرشانی کنوک وتی جاہءَ راست اَنت، حکومت ءَ ہوار اپوزیشن ہم پی ٹی وی ءِ باسکاں گوں ہم کوپگ اِنت، پی ٹی وی ءِ ایم ڈی ءَ را عہدگءَ چہ ہلاس کنگ بہ بیت۔ کمیٹی ءِ باسک خوش بخت شجاعت ءَ زھرشانی کنوکاں گوں گشتگ کہ پی ٹی وی ءِ ملازم آنی گپ گوشدارگ بوتگ نوں اے جیڑہ گیش ءُ گیوار کنگ بیت۔ کمیٹی ءِ باسک روبینہ خالد ءَ گشتگ کہ اپوزیشن اے جیڑہ ءِ سرءَ پی ٹی وی ملازم آں گوں ہم کوپگ اِنت، اگاں اے جیڑہ گیشءُ گیوار نہ بوت گڑ پیپلز پارٹی پی ٹی وی ملازم آنی زھرشانی ءَ ہوار بیت۔
