اسلام آباد۔ 25 فروری (اے پی پی) صدر مملکت ڈاکٹر عارف علوی قطری امیری نیول فورسز نا کمانڈر میجر جنرل عبداللہ بن حسن الصلیطی ءِ ’’ہلال امتیاز ‘‘ (عسکری ) اس تسنے۔ دا چرجوئی ٹی دوشنبے نادے آ ایوان صدر اٹی اعزاز آتا بشخ وپانٹ نا خصوصی ءُ دود اس اڈ ہلک ہراٹی پاک بحریہ نا سروک ایڈمرل ظفر محمود عباسی و سینئر آفیسر آک ہم ساڑی ئسر۔ داکان پد کمانڈر قطری امیری نیول فورسز صدر مملکت تون اوڑدہی کرے۔ داوخت آ صدر مملکت اودے مبارکباد ترسا پارے کہ پاکستان قطر اتون تینا برادرانہ تعلقداری تے بھاز اہمیت ایتک۔ اوپاکستان بحریہ نا مشق ’’امن‘‘ اٹی قطر امیری نیول فورسز نا باقاعدگی اٹ بشخ ہلنگ نا ستاءِ کرے۔ صدر دا ہیت آ ہم است جمی نا درشانی ءِ کرے کہ ہڑتوم آ ملک آتا بحری فوج اسہ ایلو تون باقاعدہ رابطہ ٹی ءُ۔ اوہڑتوم آ بحری فوج آتا نیام اٹ آپریشنل رابطہ غاتے پین ودفنگ نا گرج آ ہم زور شاغا۔ صدر داہیت ءِ تالان کرے کہ پاکستان قطر اکن خاص کر جوڑ جاڑی مواد، دوائی سازی، انجینئرنگ مصنوعات، طبی سازوسامان، گوازی تا سامان و فیبرکس نا بشخ آتے ٹی تینا برآمد آتے متنوع کننگ نا خواہندار ءِ۔ اوپارے کہ پاکستان درملکی زرکاری کن بھاز سازگار ءِ۔ اوقطری زرکارآتے چندی بشخ آتے ٹی خاص کر سیل و سوات نا پڑاٹی زرکاری نا سلہ خلک۔ صدر مملکت پاکستانی تے کن بننگ آ ویزہ نا آسراتی و پاکستان آن اسہ لکھ کارندہ غاتے روزگار نا منظوری نا بابت قطر انا فیصلہ غاتا ستاءِ کرے۔ کمانڈر قطر امیری نیول فورسز ہلال امتیاز(ملٹری) اس تننگ آ صدر و حکومت پاکستان نا منت واری ءِ ہرفسا اومیت ظاہر کرے کہ ہڑتوم آ ملک آتا بحری فوج آتانیام اٹ تین پہ تینی کمکاری آخبت اٹ پین مون آ دننگرہ۔
