اسلام آباد۔ 25 فروری (اے پی پی) بنجائی وزیر اطلاعات و نشریات چوہدری فواد حسین پارینے کہ مچ آ پی ٹی وی اسہ کنڈ ءِ و ایم ڈی پی ٹی وی اسہ کنڈآٹے، داوڑمعاملہ غاک ہمہ چلینگرہ ، 23 دے آن پی ٹی وی ہیڈکوارٹرز بند ءِ ایم ڈی ہمونگ ہم ہِننگ کپک، ایم ڈی نا عہدہ چٹانے پوسکن آ ایم ڈی کن اشتہار ہم تننگانے، ایم ڈی پی ٹی وی ءِ بایدے تینٹ استیفہ تروئی مرے۔ او دوشنبے نادے آ پیمر اہیڈ کوارٹر اٹی قائمہ کمیٹی اطلاعات و نشریات نا چیئرمین و کمیٹی نا باسک آتا کنڈآن پی ٹی وی نا مچی کروک آتے معاملہ نا ایسری نا باورکرفنگ آن پد میڈیا تون گپ و تران کریکہ۔ پیمر اہیڈکوارٹر اٹی سینیٹ نا قائمہ کمیٹی اطلاعات ونشریات نا دیوان اٹی پی ٹی وی ملازم آتا بھلو کچ اس پیمر اہیڈ کوارٹر نا پیشن آ مچ ئسر و ایم ڈی پی ٹی وی نا برخلاف پبی برانز کرسا کریر، مچی کروک آک پلے کارڈہم ہرفیسر ہرافتیا ایم ڈی پی ٹی وی ءِ اینک کننگ نا خواست نوشتہ ئس۔ بنجائی وزیر اطلاعات و نشریات چوہدری فواد حسین میڈیا تون گپ و تران کرسا پارے کہ مچ آ پی ٹی وی اسہ کنڈ آٹے و ایم ڈی پی ٹی وی اسہ کنڈآٹے، سینیٹ نا قائمہ کمیٹی اطلاعات و نشریات نا غٹ باسک آک ایم ڈی ءِ اینک کننگ نا پارینو، کمیٹی تینا سلاہ و سوج آتے وزیراعظم ءِ ایتک۔ اوپارے کہ ایم ڈی پی ٹی وی ءِ بدل مروئی ءِ ، ایم ڈی پی ٹی وی معاملہ ءِ ہائی جیک کرینے، اسہ ایم ڈی اف اونا پد پشت پین بندغ ہم ارے۔ بنجائی وزیر اطلاعات و نشریات چوہدری فواد حسین شاعرانہ وڑاٹ ردعمل ترسا پارے کہ ’’ہیں کواکب کچھ نظر آتے ہیں کچھ‘‘۔ اوپارے کہ ہراتم اسکان چیئرمین ہی مفک بورڈ آف ڈائریکٹر ہمہ کاریم کیک، ہراتم چیئرمین مریک تو ولدا بورڈ ہم پورو مریک و بورڈ انا کارروائی ہم کانودی حیثیت تخک۔ داوخت آ تو بورڈ ہی اف تو اونا کارروائی ہمہ۔ اوپارے کہ پی ٹی وی انتظامیہ کمیٹی ٹی ہم بفک، داوڑمعاملہ غاک ہمہ چلینگرہ۔ سینیٹ نا قائمہ کمیٹی نا چیئرمین فیصل جاوید دیوان آن پد کمیٹی نا باسک آتون اوار مچی کروک آ تیا ہنا و اوفتا خواست آتے بِننگ آن پد یخین دہانی کرفے کہ سینیٹ نا قائمہ کمیٹی دا معاملہ نا نوٹس ءِ ہلکونے و دیوان اٹی ہم داڑا ہیت وگپ مسنے، وزیر اطلاعات چوہدری فواد حسین ہم وزیراعظم ءِ پی ٹی وی نا ملازم آتا گڑتی تا بابت چھٹی اس نوشتہ کرینے۔ قائمہ کمیٹی اطلاعات و نشریات نا باسک پیر صابر شاہ پارے کہ پی ٹی وی ملازم آتا برانز بالکل سہی ءِ، حکومت تون اوار اوار اپوزیشن ہم دامعاملہ ٹی پی ٹی وی ملازم آتون تفوک ءِ۔ ملازم آتا گڑتی تیا ایم ڈی پی ٹی وی ءِ عہدہ غان بایدے اینک مرے۔ کمیٹی نا باسک خوش بخت شجاعت مچی کروک آتون گپ و تران کرسا پارے کہ پی ٹی وی نا ملازم آتا برانز ریکارڈ آ بسنے ، داسہ دا معاملہ ءِ ایسر کننگ آن بیدس پین ہچ ءُ چارہ اس اف۔ کمیٹی نا باسک روبینہ خالد پارے کہ اپوزیشن دا معاملہ غا پی ٹی وی ملازم آتون تفوک ءِ ، اگہ دا ویل ایسر متو تو پیپلزپارٹی پی ٹی وی ملازم آتون برانز اٹی بشخ ہلیک۔
