اسلام آباد۔ 25 فروری (اے پی پی) وزیر خارجہ شاہ محمود قریشی پارینے کہ پلوامہ واقعہ غان پد سویلی ایشیا ٹی امن و ایمنی نا حالیت آک بے کچ ویل و ویچڑ مسنو، مقبوضہ جموں و کشمیر اٹی حالیت آک بے کچ بے چیٹ ءُ، پاکستان پرامن ہمسائیگی و علاقائی امن آ باور کیک، پاکستان بے کچ زمواری نا درشانی ءِ کرسا بھارت آن شاہدی بٹنگا و پلوامہ واقعہ نا جاست وپاست اٹی پورو کمک نا پیش کش کرینے۔ اوداخیال آتا درشانی ءِ جاپان نا وزیر خارجہ تاروکونوو جرمنی نا وزیر خارجہ ہیکو ماس تون ٹیلی فون آ گپ و تران کرسا کرے۔ جاپانی وزیر خارجہ تون گپ و تران اٹی وزیر خارجہ مخدوم شاہ محمو دقریشی اودے تینا دورہ جاپان ءِ پد بٹنگ نا سوب آتیان معلومدار کرے۔ اوپارے کہ تدوک آ سال جاپان نا بڑزکو شخصیت آتا پاکستان نا پدریسہ دورہ غاتیان ہڑتوم آ ملک آتا نیام اٹ تین پہ تینی تعلقداری تیٹی بھاز گچینی بس ہندا رداٹ نا سلہ غا کنے 24 فروری آ جاپان نا دورہ غا رادہ مروئی ئسک ولے بدبختی اٹ پلوامہ واقعہ غان پد سویلی ایشیا ٹی امن و ایمنی نا حالیت آک بے کچ ویل و ویچڑ مسنو ، مقبوضہ جموں و کشمیر اٹی حالیت آک بے کچ خراب ءُ۔ وزیر خارجہ پارے کہ او اقوام متحدہ نا سیکرٹری جنرل ءِ دا بے چیٹی ءِ کم کننگ، بذریعہ چھٹی تینا کڑد ءِ ادا کننگ کن پارینٹ و جاپان ءِ ہم دا رداٹ تینا گچین کڑد ادا کننگ نا خواست کرینٹ، دا نازرک حالیت آتے ٹی کنا تینا ملک اٹی ساڑی مننگ المی ءِ و دا سوب آتا بنا آ کنے تینا جاپان نا دورہ ءِ پد بٹوئی تما۔ ہیت وگپ اٹی ہڑتوم آ وزیر خارجہ غاک زوت آن زوت تین پہ تینی سلابت اٹ دورہ جاپان نا پوسکن ءُ تاریخ اس پک کننگ آ امنا کریر۔ وزیر خارجہ پارے کہ جاپان و پاکستان نا نیام اٹ دیرینہ ہڑتوم آ کنڈآتا دوستانہ تعلقداری ءِ۔ اوجاپانی وزیر آن خواست کرے کہ او تینا وزیراعظم ءِ ہم دا غٹ حالیت آتیان معلومدار کیک ہرانا سوب اونا دورہ جاپان ءِ پد بٹوئی تما۔ جاپان نا وزیر خارجہ پارے کہ وزیر خارجہ پاکستان ہراتم جاپان نا دورہ غا بریک و اودے وزیراعظم جاپان تون ہم اوڑدہی کرفنگک۔ وزیر خارجہ مخدوم شاہ محمود قریشی جرمنی نا وزیر خارجہ ہیکو ماس تون ہم ٹیلی فون آ گپ و تران کرے۔ وزیر خارجہ تینا جرمن ہم منصب ءِ پلوامہ واقعہ غان پد ڈیہہ ٹی امن و ایمنی نا حالیت آتیان معلومدار کرے۔ اوپارے کہ بھارت نا بے جا دوبہ و جارحانہ بیان تیان پد ہم پاکستان بے کچ زمواری نشان ترسا بھارت آن شاہدی بٹنگا و پلوامہ واقعہ نا جاست وپاست اٹی پورو کمک نا پیش کش کرینے۔ اوپارے کہ پاکستان پرامن ہمسائیگی و علاقائی امن آ باور کیک۔ وزیر خارجہ تینا جرمن ہم منصبءِ مقبوضہ کشمیر خاص کر پلوامہ جلہو آن پد مقبوضہ کشمیر اٹی انسانی حق انا بگڑینگوک آ حالیت آتیان ہم معلومدار کرے۔ کڑدہ غاک پاکستان و جرمنی نا نیام اٹ ہڑتوم آ کنڈآتا ساڑی آ تعلقداری تیا است جمی نا درشانی ءِ کریر۔
