ریلوے اسٹیشن تا باتھ روم و پبلک ٹوائلٹ آتا ہر اِراگھنٹہ غان پد سفائی، دیر انا فراوانی ءِ المی جوڑ کننگ انگ ءِ
اسلام آباد۔ 25 فروری (اے پی پی) بنجائی وزیر ریلوے شیخ رشید احمد نا پارت آ پاکستان ریلوے ٹی کلین، گرین و خوش اخلاقی مہم برجاءِ۔ شیخ رشید یکم فروری آن مہینہ سفائی اس اڈتننگ ناپارت کریسس ہرا 28 فروری اسکان برجاسلک۔ بنجائی وزیر تینٹ ہم چندی اسٹیشن آتیا ہنسا مہم نا جاچ ءِ ہلکونے۔ و چندی ٹرین تیا سفر کرسا دا مہم ءِ سرسہب کننگ کن پبی کڑد ادا کرے۔ دا چرجوئی ٹی بھلا اسٹیشن تا دنگ اٹی زیات مچی کروک آ جاگہ، پلیٹ فارم، انتظارگاہ ، دفتر، پول آ ہِننگ نا جاگہ، سیڑھی، پلیٹ فارم نا نیام اٹ ٹریک ءِ ہر ٹرین نا روانگی آن پد پدریسہ ساف کننگ انگ ءِ۔ ریلوے اسٹیشن تا باتھ روم و پبلک ٹوائلٹ آتا ہر اِراگھنٹہ غان پد سفائی ءِ کننگ انگ ءِ۔ واش بیسن، سینٹری فٹنگ، شیشہ و کموڈآتا سفائی ءِ المی جوڑ کننگ انگ ءِ۔ داکان بیدس باتھ روم و سفائی نا ایلو جاگہ غاتیا دیر انا فراوانی ءِ المی جوڑ کننگانے۔ ریلوے اسٹیشن تا دنگ اٹی ہل و ایلو حشرات آتے کنٹرول کننگ نا گام گیج آتے المی جوڑ کننگانے۔ دا بابت اسٹیشن منیجر، اسٹیشن ماسٹر، سینٹری انسپکٹر ز تینٹ اسٹیشن آتا دنگ اٹی انتظارگاہ تا جاچ ءِ ہلنگ ءُ۔ اسٹیشن آتا دنگ اٹی وینڈنگ سٹالز، کینٹین و ٹرین تیٹی سفائی ءِ چیک کننگ انگ ءِ۔ و دا چرجوئی ٹی ہردے نا بنداو آ رپورٹ ڈویژنل آفیسرز و ڈویژنل سپرنٹنڈنٹ ءِ پیش کننگ انگ ءِ۔ ڈویژنل میڈیکل آفیسر و ڈویژنل کمرشل آفیسر آتا ایلو دے تیٹی اسٹیشن تا دنگ اٹی باتھ روم ، وینڈنگ سٹالز و انتظارگاہ تے چیک کننگ ءُ۔ و سفائی ءِ المی جوڑ کننگ کن دمدستی گام گیج کننگ ءُ۔ ورکس انسپکٹر اسٹیشن نا دنگ اٹی باتھ روم تے کن دیر و کنوئی ءُ دیر انا فراوانی ءِ المی جوڑ کننگ کن تینا کڑد ءِ ادا کننگ ءِ۔ اسسٹنٹ انجینئرز و ڈویژنل انجینئرز یارڈ اٹی ٹریک انا سفائی ءِ المی جوڑ کننگ کن گام گیج کننگ ءُ۔ ٹریک انا ماس آ تِرک کروک آ نیال آتے ہفتہ نا بنداو آ ساف کننگ انگ ءِ۔ الیکٹرک فورمین و ٹرین ایگز مینر ٹرین نا چلینگ انگ نا بنائی و نیامی اسٹیشن تیا لیٹ، بلف، فلشنگ سسٹم، ایگزاسٹ فین، دیر انا دوئی، صابن ٹرین نا ٹوائلٹ آتے ٹی واشنگ لیکوڈ ءِ المی جوڑ کننگ کن کاریم کننگ ءُ۔ یات سلے کہ پاکستان ریلوے ٹی اولیکو وار دا لیول آ سفائی مہم اس بناکننگانے ہرانا چاروکی ءِ تینٹ بنجائی وزیر ریلوے کننگ ءِ۔ دا مہم نا مسخت مسافر آتے گچین سفری آسراتی و چاگڑد اس فراوان کننگ نا ءِ۔ تانکہ اوفتا ریلوے آ پت بحال مرے و او ریلوے نا ذریعہ سفر ءِ اولیت ایتر۔
