اسلام آباد ۔ 23 فروری (اے پی پی) دری کارانی بنجاہی وزیر مخدوم شاہ محمود قریشی ءَ گوشت کہ پاکستان امن ءُُ ایمنی ءِ پراھی ءِ ھاترا جنوبی ایشیا ءُُ وتی ھمساھگاں را باز ارزشت دیگ انت۔دری کارانی کارگس ءِ ربالکار ءِ گوشگ ءِ ردا ھپتگ ءَ وتی نیپالی ہمکار پردیپ کمار گیاوالی ءِ گوما ٹیلیفون ءِ سرا گپ ءُُ تران کنان ءَ دری کارانی وزیر شاہ محمود قریشی ءَ گوشت کہ سارک فورم ءِ مکسد خطہ ءِ ملکاں را نزیک آرگی انت سارک جنوبی ایشیا ءِ تہ امن ءُُ ایمنی ءِ برجاہی ھاترا وتی تعمیری کرد ادا کن ایت۔پردیپ کمار گیاوالی چیئر آف سارک ھم انت۔گپ ءُُ تران ءِ ساعت ءَ خطہ ءِ تہ امن ءُُ ایمنی ءِ جاورھال ءِ سرا ھیال ریچی کتگ۔دری کارانی وزیر ءَ گوشت کہ پاکستان امن ءُُ ایمنی ءِ پراھی ءِ ھاترا جنوبی ایشیا ءُُ وتی ہمساھگ ملکاں را باز ارزشت دیگ انت۔نیپال ءِ دری کارانی وزیر ءَ گوشت کہ خطہ ءِ تہ امن ءُُ ایمنی ءِ برجاہ دارگ درستانی ذمہ واری انت۔نیپال، سارک ءِ باسک بوھگ ءُُ پاکستان ءِ دوست بوھگ ءِ سبب ءَ پکہ سدکی دارگ انت کہ امن ءِ پاسداری درستانی نپ ءُُ پائدگ ءَ انت۔
