پاک سعودیہ تعلقداری و تین پہ تینی است خواہی نا ایلو معاملہ غاتیا گپ و تران
اسلام آباد۔ 21 فروری (اے پی پی) اسپیکر قومی اسمبلی اسد قیصر تون سعودی عرب اٹی تعینات پاکستان نا سفیر راجہ علی اعجاز پنچ شنبے نادے آ داڑے اوڑدہی کرے۔ اوڑدہی ٹی پاک سعودیہ تعلقداری و تین پہ تینی است خواہی نا ایلو معاملہ غاتیا گپ و تران کننگا۔ اسپیکر قومی اسمبلی گپ و تران کرسا پارے کہ پاکستان سعودی عرب تون تینا متکن آ برادرانہ تعلقداری تے بھاز قدر انا نظر اٹ ہرک، سعودی عرب مدام مشکل ساہت اٹی مہروان دوست اس مرسا پاکستان تون تفینے، پاکستان و سعودی عرب نا الس اسہ خاہوت نا وڑ ءُ۔ اسپیکر اسد قیصر پارے کہ سعودی ولی عہد محمد بن سلمان نا ساڑی دورہ پاکستان ہڑتوم آ کنڈآتا تعلقداری تے پین سوگو کننگ اٹ اہم کڑد ادا کیک، سعودی ولی عہد محمد بن سلمان نا ساڑی سرسہب دورہ پاکستان نا دروس نتیجہ مرتب مریک۔ اسد قیصر پارے کہ سعودی ولی عہد نا کنڈآن پاکستانی بندی تا یلہ کننگ نا پڑو اسہ تاریخی ءُ گام اسے، سعودی عرب نا کنڈآن پاکستان تون مروک آ معاہدہ غاتا ملکی معیشت آ گچین زہم تمک، ہڑتوم آ ملک آتا نیام اٹ سفارتی و السی کہول آ رابطہ غاتیان ہم گرنچی ءِ مون آ دننگ رسینگک۔ اسپیکر قومی اسمبلی پارے کہ سعودی عرب اٹی رہینگوک پاکستانی تے سفارتی کہول آ ہروڑ کمک فراوان کننگے، سعودی عرب اٹی پاکستان نا حقی دروشم ءِ تالان کننگ و سعودی زرکارآتے پاکستان اٹی زرکاری آ رضامند کننگ اٹ پاکستانی سفارت خانہ نا کڑد بے کچ اہمیت تخک۔ اسدقیصر پارے کہ پاک۔سعودی تعلقداری تے سوگو کننگ اٹ پاکستان نا سفیر راجہ اعجاز نا کڑد ستاکڑزک۔ راجہ علی اعجاز پارے کہ سعودیہ نا حکومت و الس پاکستان تون دوستانہ تعلقداری تے بھاز اہمیت ایترہ، پاکستانی سفارت خانہ ہڑتوم آ کنڈآتا تعلقداری تے سوگو کننگ اٹ پبی کڑد ادا کننگ ءِ، سعودی ولی عہد محمد بن سلمان نا ساڑی آ دورہ پاکستان ہڑتوم آ کنڈآتا تعلقداری تے مون آ دننگ اٹ اسہ مزل نا نشان اس جوڑ مریک۔ پاکستانی سفارت خانہ دا اہم انگا معاملہ غا کاریم نا بناءِ کرینے و تعلقدار سعودی کمامدارآتون رابطہ ٹی ءِ۔ پاکستانی سفیر پارے کہ زوت اسے اٹ قوم ءِ خوشخبری ملک۔ اوپاکستان و سعودی عرب نا پارلیمان اٹی رابطہ غاتے فعال و متحرک کننگ آ امنا کریر۔
