اسلام آباد۔ 22 فروری (اے پی پی) بنجائی وزیر خزانہ اسد عمر پارینے کہ قومی معیشت نا بحالی کن کروک آ حکومتی گام گیج آتا مثبت بھرمک پاش مننگ ءُ و ملک انا کرنٹ اکاؤنٹ نسخان( حسابات جاریہ نا نسخان) دا ہیت انا عکاسی ءِ کیک۔ جمعہ نادے آ تینا ٹویٹ اٹی وزیر خزانہ پارے کہ ڈیفالٹ نا خڑک رسینگوک آ ملکی معیشت نا بحالی کن حکومت نا فیصلہ کن گام گیج آتا مثبت بھرم مون آ بننگ ءِ۔ اوپارے کہ جنوری ٹی حسابات جاریہ نا نسخان اٹی تدوک آ سال انا ہندا وخت انا مقابلہ ٹی 54 درسد کمتی واقع مسنے وخت اس کہ تدوک آ مالی سال انا بنائی 7 تُو انا مقابلہ ٹی اینخو مالی سال اٹی جولائی آن جنوری ٹی کرنٹ اکاؤنٹ نسخان اٹی 1.7 ارب ڈالر کمتی واقع مسنے۔ داہیت قابل ذکر ءِ کہ اینخو مالی سال انا اولیکو 7 تُواٹی ملک انا کرنٹ اکاؤنٹ نسخان اٹی 16.79 درسد نا کمتی ریکارڈ کننگانے ہرادے پک اسٹیٹ بینک آف پاکستان نا جاری کروک تازہ انگا رپورٹ اٹی ہم کننگانے۔ اوپارے کہ جولائی آن جنوری 2018-19ء ٹی کرنٹ اکاؤنٹ نسخان 8424ملین ڈالر مسنے وخت اس کہ تدوک آ مالی سال اٹی جولائی آن جنوری 2017-18 ء ٹی حسابات جاریہ نا نسخان 10 ہزار 124 ملین روپئی ریکارڈ کننگاسس۔ ہندا وڑ گڑا و خذمت ہڑتوم آتا نسخان اٹی 5.25درسد کمتی آن نسخان 20 ہزار 796 ملین ڈالر نا مقابلہ ٹی 19 ہزار 704 ملین ڈالر اسکان کم مسنے۔ وزیر خزانہ پارے کہ جم قومی پیدوار (جی ڈی پی) نا رداٹ کرنٹ اکاؤنٹ نسخان نا کچ ہم اینخو مالی سال اٹی کم مرسا 4.9 درسد مسنے وخت اس کہ تدوک آ مالی سال انا اولیکو 7 تُو اٹی جی ڈی پی نا مقابلہ ٹی کرنٹ اکاؤنٹ نسخان نا کچ 5.4 درسد ئسک۔
