اقوام متحدہ۔ 22 فروری (اے پی پی) اقوام متحدہ نا سلامتی کونسل نا کنڈآن مقبوضہ کشمیر اٹی پلوامہ واقعہ غان اسہ ہفتہ اس پد جاری بیان اٹی خود کش جلہو نا مذمتءِ کرینے و واقعہ ٹی پاکستان ءِ اوار کننگ نا غٹ تر بھارتی کوشست آتے رد کرینے۔ بیان اٹی پاننگانے کہ 15باسکی سلامتی کونسل مقبوضہ جموں وکشمیر اٹی خود کش جلہو نا ترندی اٹ مذمت ءِ کیک ہراٹی 40 آن زیات بھارتی فوجی تپاخت وخت اس کہ کیہی پینک ٹھپی مسوسر ۔ 14 فروری 2019 ء آ مروک آ جلہو نا زمواری ءِ جیش محمد قبول کریسس۔ سفارتی ذرائع’’اے پی پی‘‘ ءِ پارے کہ تدوک آ 6 دے ٹی بھارت نا کنڈآن سلامتی کونسل نا باسک آتون پدریسہ پاننگاکہ او تینا بیان اٹی پاکستان نا پن ءِ اوار کیر ولے پاکستانی سفارت کار آتا کوشست آن بھارت ءِ تینا مسخت اٹی سرسہبی دوئی مننگ کتو۔ سفارتی محاذ آ بے سہبی آن پد بھارت داسہ سلامتی کونسل نا بیان اٹی جیش محمد نا پن ءِ تینا سرسہبی سمجھک ولے سفارتی چاہندارآک پارینو کہ جیش آ مست آن پابندی ءِ انتئے کہ اقوام متحدہ دا تنظیم ءِ بلیک لسٹ اٹی اوار کرینے۔ اسہ افریقی سفارت کار اس سوج کرے کہ داسہ بھارتیک انت اسے نا خوشی ءِ کننگ ءُ۔ سلامتی کونسل نا بیان اٹی پلوامہ واقعہ ءِ دہشت گردی نا جاگہ غا اسہ خود کش جلہو اس گوندانے۔ بیان اٹی پاننگانے کہ کونسل نا باسک آک دہشت گردی نا ہروڑنا وڑتا مذمت ءِ کیک و دانا چٹفنگ کن سنبرینگوک ءِ انتئے کہ داڑان جہانی سلامتی و امن ءِ گڑتی مون تروک ءِ۔ سیکورٹی کونسل نا باسک آک دہشت گردی نا است بڈی و کمکاری ءِ کروک آ عنصر آتا بارواٹ پارینے کہ اوفتے اوفتا کروک نا سزا تننگک و غٹ ملک آتیا زور شاغانے کہ او جہانی کانود و سلامتی کونسل نا قرارداد آتا رداٹ دہشت گردی نا چٹفنگ کن تینا زمواری تے پورو کیر۔
