اسلام آباد۔ 22 فروری (اے پی پی) بنجائی وزیر آبی وسیلہ فیصل واوڈا پارینے کہ بھارت نا دیر ءِ توننگ نا دھڑکو پلوامہ واقعہ غانبار بھارتی جاسوس دہشت گرد کلبھوشن کیس اٹی بے سہبی آن چکار ءِ اسہ کنڈ کننگ نا بے سہب ءُ کوشست اسے، سندھ طاس معاہدہ نا رداٹ بھارت پاکستان نا بشخ انا دیر ءِ توننگ کپک۔ داخیال آتا درشانی ءِ او جمعہ نادے آ بھارت نا کنڈآن پاکستان نا دیر ءِ توننگ نا بابت بیان آ تینا ردعمل اٹی پارے۔ اوپارے کہ سندھ طاس معاہدہ نا رداٹ بھارت پاکستان نا بشخ انا دیر ءِ توننگ کپک، دیر ءِ توننگ نا دھڑکو مضحکہ خیزو فضول ءُ ہیت اسے۔ اوپارے کہ بھارتی حکومت تینا بروک آ گچین کاری کن دوبہ خلنگ ءِ۔ اوبھارت ءِ خبڑدار کرینے کہ دا پوسکن آ پاکستان ءِ بھارت ءِ معلوم مرے، بھارت جنگ انا نتیجہ غاتیان باخبر مرے۔ فیصل واوڈا پارے کہ بہادر پاکستانی فوج بھارت ءِ پبی ورندی ایتک، بھارت نا جنگی جنون اودے ہچ ءُ فائدہ اس تفک۔ اوپارے کہ بھارت تینا بے سہبی نا زموار ی ءِ پاکستان آ بِٹنگ کپک۔
