اسلام آباد۔ 21 فروری (اے پی پی) بنجائی وزیر خزانہ اسد عمر پارینے کہ بھارت نا واپار نا بابت غیر مناسب و غیر دانشمندانہ فیصلہ غان پاکستان زہمی مفک بلکن دا فیصلہ تینٹ بھارت کن نسخان تروک جوڑ مریک، حکومت گورننس اٹی گچینی اتنگ کن سرکاری بشخ اٹی اصلاحات اتنگ ءِ ہرافتیا عملدرآمد آن ملک پائیدار شونداری و شونہالی نا کسر آ روان مننگ کیک۔ او پنچ شنبے نادے آ ایسوسی ایشن آف چارٹرڈ اکاؤنٹینٹس (اے سی سی اے) پاکستان نا کنڈآن ’’پاکستان لیڈرشپ کنورسیشن2019‘‘ آن تران و اوکان پد میڈیا نا نمائندہ غاتون گپ و تران کریکہ۔ اوپارے کہ بھارت نا کنڈآن پاکستانی مصنوعات آتا درآمد آ ڈیوٹی تیٹی ودکی کننگ نا فیصلہ جوان اف، داڑان پاکستانی مصنوعات و واپار آ زہم تمپک بلکن دانا بھارت ءِ تینٹ نسخان مریک۔ وزیر خزانہ انٹرنیشنل مانیٹری فنڈ(آئی ایم ایف) تون مذاکرات نا بابت پارے کہ حکومت پاکستان و آئی ایم ایف نا نیام اٹ تکنیکی سیشن باقاعدگی اتون اڈ ہلنگ ءِ و چندی معاملہ غاتا بارواٹ اختلاف آک کم مسنو۔ اوپارے کہ دُن ءُ اِرا سیشن تدوک آ ہفتہ اڈ ہلکونو وخت اس کہ اسہ پین دیوان اس بروک آ ہفتہ غا پک ءِ، دا دیوان تے ٹی حساب و کتاب نا تبادلہ مننگ ءِ۔
