اسلام آباد۔ 21 فروری (اے پی پی) بنجائی وزیر تعلیم و کسبی تربیت شفقت محمود پارینے کہ گچین مروک آ ہچ ءُ نمائندہ اس کانود آن ایڑتر اف، نیب اسہ آجوءُ ادارہ اسے، حکومت نا اوڑتون ہچ ءُ کاریم اس اف، پیپلزپارٹی و (ن) لیگ 10 دہ سال حکومت اٹی ئسر، نیب نا کانود اگہ مون انگا کانود ءِ تو اودے انت اکن چٹفتوس، پارلیمنٹ و جمہوریت ہچ کس نا وڈی خوری نا ڈھال مننگ کپک، پاکستان نا نیزگار الس ءِ پلنگا، لٹ وپل کروک آتا برخلاف کارروائی مننگ ءِ، اپوزیشن اگہ احتساب آ اعتراض کیک تو عدالت آتیا کائے۔ پنچ شنبے نادے آ قومی اسمبلی ٹی سید خورشید شاہ نا اعتراضی ٹک انا ورندی ٹی بنجائی وزیر پارے کہ نن داہیت آ باور کینہ کہ احتساب نا عمل آ ہچ کس ءِ ہچ ءُ اعتراض اس اف، اعتراض ہمو ادارہ غا کننگ انگ ءِ ہرا دا پارلیمنٹ نا بشخ اف، و جنرل (ر) پرویز مشرف دا ادارہ ءِ جوڑ کریسس، مسلم لیگ (ن) و پیپلزپارٹی نا حکومت آک 5,5 سال مسنو ، اوفتا دور اٹی ہژدہ می ترمیم کون آ تاریخیءُ ترمیم اس مس، آئین نا اسہ تہائی بشخ ءِ بدل کننگا ولے ہمووخت آ اوفک نیب انا کانود اٹی ہچ ءُ بدلی اس کتوس، نیب انا کانود اگہ غلط ءِ تو ولدا اودے بدل کروسر۔
