پاکستان و ایران نا نیام اٹ ریل نیٹ ورک نا گچینی و شریداری ہڑتوم آ ملک آتا تین پہ تینی فائدہ ٹی ءِ، کوئٹہ ، تفتان و زاہدان ریل ٹریک ءِ گچین کننگ کن کوشست آتے ترند کننگک، بنجائی وزیر ریلوے شیخ رشید احمد نا ایرانی سفیر تون گپ و تران
اسلام آباد۔ 21 فروری (اے پی پی) بنجائی وزیر ریلوے شیخ رشید احمد پارینے کہ پاکستان و ایرانی نا نیام اٹ ریل نیٹ ورک نا جوانی و شریداری ہڑتوم آ ملک آتا تین پہ تینی فائدہ ٹی ءِ، تفتان و زاہدان ریل ٹریک ءِ گچین کننگ کن کوشست آتے ترند کننگک، پاکستان ریلوے ایرانی ریلوے نا چاہنداری تیان فائدہ ہرفک، تکنیکی چاہندار آتا ٹیم تے زوت جوڑ کننگک۔ داخیال آتا درشانی ءِ او پنچ شنبے نا دے آ داڑے ایرانی سفیر مہدی ہنر دوست تون اوڑدہی ٹی کرے۔ اوڑدہی ٹی ایرانی سفیر ریلوے ءِ ایرانی حکومت نا کنڈآن قازوین۔رشت ریلوے روٹ انا بنائی دود اٹی بشخ ہلنگ نا دعوت نامہ اس تس، ہرانا ایرانی صدر حسن روحانی مہمان خاص مریک۔ دود ہندا سال اٹی 6 مارچ آ مریک۔ سلہ نامہ ءِ ایران نا وزیر روڈ اینڈ اربن ڈویلپمنٹ محمد اسلامی تسنے، میزبان ایرانی صدر مریک۔ داوخت آ گپ و تران کرسا شیخ رشید احمد پارے کہ پاکستان و ایران نا نیام اٹ ریل نیٹ ورک انا گچینی و شریداری ہڑتوم آ ملک آتا تین پہ تینی فائدہ ٹی ءِ۔ کوئٹہ، تفتان و زاہدان ریل ٹریک ءِ گچین جوڑ کننگ کن کوشست آتے ترند کننگک۔ پاکستان ریلوے ایرانی ریلوے نا چاہنداری آن فائدہ ہرفک، تکنیکی چاہندار آتا ٹیم ءِ زوت جوڑ کننگک۔ اوپارے کہ ایران و پاکستان اسلام نا سوگو رشتہ غاتے ٹی گنڈوک ہمسایہ ءُ و ہڑتوم آ ملک آتا نیام اٹ سوگو مذہبی، راجی و دودوربیدگی تعلقداریک ءُ۔ داوخت آ ایرانی سفیر پارے کہ پاکستان ایران نا برادر ملک ءِ و ننا تعلقداریک بھاز متکن ءُ۔
