اسلام آباد۔ 21 فروری (اے پی پی) پولیو وائرس نا ساڑی مننگ نا سوب خاص انگا علاقہ غاتے ٹی 10 سال اسکان نا وئی نا چناتے پولیو ویکسین نا پڑی کنفنگ نا فیصلہ کرینن وخت اس کہ ملک انا ایلو غٹ علاقہ غاتے ٹی پولیو ویکسین نا پڑی 5سال اسکان نا وئی نا چناتے کنفنگک۔ انسداد پولیو پروگرام نا فوکل پرسن بابر بن عطاء پارینے کہ دا خبر اٹی ہچ ءُ راستکی اس اف کہ مچ آ ملک اٹی پولیو نا پڑی 10 سال نا وئی اسکان چناتے کنفنگک۔ تینا ٹویٹ اٹی او پارے کہ راولپنڈی نا 16یونین کونسل آتے ٹی 10 سال اسکان نا چناتے پولیو نا پڑی کنفنگ انگ ءِ ہرانا سوب پیر ودھائی، صفدر آباد و کیبی علاقہ غاتا گٹر نا دیر تے ٹی بھلو کچ اسے ٹیی پولیو وائرس نا ساڑی گری ءِ۔ پولیو وائرس نا پورو چٹفنگ کن 10 سال اسکان نا وئی نا چناتے ہم پولیو نا پڑی کنفنگانے۔ اوپارے کہ راولپنڈی نا 16یونین کونسل آتے ٹی 10 سال اسکان نا چناتے پڑی کنفنگ نا فیصلہ اسلام آباد اٹی دسمبر نا تُو و جنوری ٹی سبزی منڈی تون کیبی 5یونین کونسل آتے ٹی 10 سال نا وئی نا چناتے پڑی کنفنگ آن پد کننگا۔ اوپارے کہ اولیکو وار جنوری آن پد اسلام آباد اٹی گٹرتا دیر تے ٹی پولیو وائرس خننگتنے۔ ہنداخاطران پولیو نا چٹفنگ نا مہم اٹی مچ آ ملک اٹی 5سال آن کم وئی چناتے ہی پولیو نا پڑی کنفنگک۔
