اسلام آباد۔ 21 فروری (اے پی پی) پاکستان پیپلزپارٹی نا باسک قومی اسمبلی سید خورشیدشاہ قومی احتساب بیورو نا کنڈآن سندھ اسمبلی نا اسپیکر آغا سراج درانی نا دزگیری نا مذمت ءِ کرسا پارینے کہ نن داڑا برانز کینہ۔ پنچ شنبے نادے آ قومی اسمبلی ٹی اعتراضی ٹک آ سید خورشید احمد شاہ پارے کہ پیپلزپارٹی پاکستانی الس تون اواری اٹ ملک اٹی جمہوریت کن قربانی تسنے۔ نن غٹ پاکستان ءِ سوگو و واکدار ملک اس ہُننگ خوانہ، دا ملک ءِ سیاست دانک جوڑ کرینو۔ اوپارے کہ پارلیمان و اسمبلی واکدار ادارہ ءُ ، ملک انا تاریخ اٹی پدریسہ داکوشست کننگانے کہ پارلیمان و اسمبلی تے نزور کننگے۔ اوپارے کہ اسپیکر نا منصب عزت و شرف نا قابل ءِ، پارلیمان سپریم ءِ و پارلیمان نا کسٹوڈین ہم سپریم مریک۔ سید خورشید شاہ پارے کہ آغا سراج درانی نا تعلق اسہ پنی ءُ سیاسی ءُ اُراسے آن ءِ، ہراوڑاودے دزگیر کننگا او است ہسونی اسے۔ اوپارے کہ سندھ اسہ اہم ءُ صوبہ و پاکستان نا بنجا نا اکائی ءِ۔ پاکستان نا بیرک ءِ غٹ آن مست سندھ اسمبلی ٹی چست کننگا، پاکستان نا حق اٹی قرارداد سندھ اسمبلی آن بس و قومی ترانہ نا توار ہم اولیکو وار سندھ اسمبلی آن بس، اوپارے کہ آغاسراج درانی نا خاہوت ءِ زیزاریفنگ آ برانز کینہ، دا مذمت نا قابل ءُ گام گیج اسے، اسپیکر ہم بایدے داڑا برانز کے، ای غٹ پارلیمنٹرینز آتیان ہم برانز اٹی اوار مننگ نا خواست کیوہ۔ سید خورشید شاہ نا تقریر نا ایسری آ ہراتم اسپیکر بنجائی وزیر شفقت محمود ءِ مائیک ءِ تس تو داٹی اپوزیشن نا باسک آک جھک مرسا ایوان اٹی نعرہ خلنگ نا بناءِ کریر۔
