چینی سفیر یاؤجنگ نا ’’سی پیک سکل ڈویلپمنٹ و روزگار نا وارخواہی‘‘ نا سرحال آ سمینار آن تران

رشکئی اقتصادی زون اٹی اسہ ہزار صنعتی یونٹ لگک، ہراڑان ہزار آپاکستانی تے روزگار ملک، چین پاکستان اقتصادی راہداری نا رداٹ آخبت اٹی 12لکھ روزگار نا وارخواہی ودی مریک
اسلام آباد۔ 21 فروری (اے پی پی) چینی سفیر یاؤجنگ پارینے کہ چین پاکستان اقتصادی راہداری نا رداٹ رشکئی اقتصادی زون اٹی اسہ ہزار صنعتی یونٹ لگک ہراڑان ہزارآ پاکستانی تے روزگار ملک ، آخبت اٹی 12لکھ روزگار نا وارخواہی ودی مریک وخت اس کہ تدوک آ پنچ سال اٹی 75 ہزار خلقت ءِ روزگار ملانے ، مون نا مرحلہ ٹی تربیت ہلوک انسانی وسیلہ غاتے تیار کروئی ءِ ہراڑا ہڑتوم آملک آک خصوصی چکار کیرہ۔ داخیال آتا درشانی ءِ او ’’سی پیک سکل ڈویلپمنٹ و روزگار نا وارخواہی‘‘ نا سرحال آ سیمینار آن تران کرسا کرے۔ داوخت آ سی پیک پروجیکٹ ڈائریکٹر حسن داؤد بٹ، سی پیک ایگزیکٹو ڈائریکٹر سینٹر فار ایکسی لینس ڈاکٹر عبدالجلیل، وائس چانسلر پائیڈڈاکٹر اسد زمان و نارو یجین سفارت خانہ نا فرسٹ سیکرٹری ڈویلپمنٹ جورن ڈبلیو پیڈ رسن ئسک ہم ساڑی ئسر۔ چینی سفیر پارے کہ وزیراعظم عمران خان نا پیدوار موقف ءِ کہ مون نا مرحلہ ٹی سی پیک نا رداٹ زیات آن زیات روزگار نا وارخواہی ودی کننگک۔ اوسعودی ولی عہد نا ساڑی آ دورہ پاکستانءِ خوش آئند گوندسا پارے کہ سی پیک نا ڈٹ آتے ٹی ایلو ملک آتا بشخ ہلنگ اسہ جوانی اسے۔ اوپارے کہ رشکئی اقتصادی زون اٹی اسہ ہزار صنعتی یونٹ لگک ہراڑان ہزارآ پاکستانی تے روزگار ملک۔ وزیراعظم عمران خان نا دورہ چین آ ہڑتوم آ ملک آتا نیام اٹ معیشت، واپار، راجی شونداری تون اوار ایلو بشخ آتے ٹی کمکاری آ امنا کننگاسس۔ اوپارے کہ چین پاکستان اقتصادی راہداری نا کمک اٹ پاکستان اٹی جاری ڈٹ آتے وخت آ پورو کننگک و پاکستان اٹی اقتصادی زون نا جوڑ کننگ آ چکار کننگانے۔ اوپارے کہ چین پاکستان نا کشاری بشخ انا شونداری و الس نا زند انا آب ءِ گچین کننگ کن ہروڑاٹ کمک کیک، آخبت چین آن سوشل اکنامک ڈویلپمنٹ نا بابت ڈل پاکستان نا دورہ ءِ کیک ہرا ہڑتوم آ ملک آتا نیام اٹ چندی پروجیکٹ آتا جاچ ءِ ہلیک۔