اسلام آباد۔ 20 فروری (اے پی پی) وزیراعظم عمران خان پارینے کہ حکومت اقوام متحدہ نا شونداری ادارہ (یو این ڈی پی) نا ورناتے بااختیار کننگ نا گام گیج ءِ مون آ درسا ورناتے مرکزی دنگ اٹی اتنگ کن قائدانہ کڑد ادا کیک۔ اوداہیت ءِ وزیراعظم نا خصوصی کمکار امور نوجوانان محمد عثمان ڈار و یو این ڈی پی نا پاکستان اٹی رہینگوک آ نمائندہ اگناشیوارتزا تون گپ و تران کرسا پارے ہرافک چارشنبے نادے آ اوڑتون اوڑدہی کریر۔ وزیراعظم ءِ یو این ڈی پی نا یوتھ امپاور منٹ پروگرام نا بارواٹ معلومدار کننگا ہرانا مسخت وزیراعظم نا یوتھ پروگرام نا اواری اٹ پنچ سال انا وخت اٹی مچ آ پاکستان اٹی ورناتتون خڑکی رابطہ تخسا اوفتے بااختیار کننگ نا گام گیج آتے ٹی کمک کننگ نا ءِ۔ محمد عثمان ڈار وزیراعظم ءِ اولیکو قومی یوتھ کانفرنس، نیشنل یوتھ ڈویلپمنٹ انڈیکس و نیشنل یوتھ ڈویلپمنٹ پروگرام کون آ خبت حکومتی پروگرام تابارواٹ ورناپڑک و کڑدہ غاتون رابطہ کاری نا کمک اٹ یو این ڈی پی تون اواری اٹ کروک آ اسیجا کوشست آتا بارواٹ معلومدار کرے۔ او نیشنل یوتھ ڈویلپمنٹ پروگرام اس جوڑ کننگ کن حکومتی کوشست آتے ٹی یو این ڈی پی نا تکنیکی و وسیلہ غاتا کمکاری نا ستاءِ کرے ہرا حکومت نا ورناتیا تخوک غٹ تر گام گیج آتے کن پلیٹ فارم آ کاریم کیک۔ داڑے دا ہیت ذکر انا قابل ءِ کہ محمد عثمان ڈار ساڑی ہی ٹی یو این ڈی پی یوتھ امپاورمنٹ پروگرام نا سٹیئرنگ کمیٹی نا اسیجا کماشی ءِ کرے۔ اواومیت ظاہر کرے کہ ننا ادارہ جاتی شریداری پاکستانی ورناتتون بامسخت رابطہ، آب اٹ تعلیم و روزگار نا اسیجا مسخت آتون ہم گرنچ مریک۔ یوتھ امپاورمنٹ پروگرام نا مسخت روزگار و اقتصادی وتواجہی ، راجی رابطہ کاری و تعلیم و کسبکاری نا سہ جہتی اپروچ نا کمک اٹ ورنانیاڑی و نرینہ غاتے بااختیار کننگ نا ءِ۔ دا پروگرام نا کمک اٹ مچ آ ملک اٹی نیاڑی تتون اوار اِرالکھ ورناتے بااختیار کننگک۔ عثمان ڈار وزیراعظم ءِ ’’تعلیمی رضاکار‘‘ پروگرام ا مدرسہ غاتا طالب علم آتے گیشتر وارخواہی تننگ نا کمک اٹ بنجائی دنگ اٹی اتنگ نا کوشست آتا بارواٹ معلومدار کرے۔ وزیراعظم ملک انا ورناتے کن تعلیم، روزگار، کسب کاری نا بابت حکومت پاکستان تون پدریسہ وابستگی و رابطہ غا یو این ڈی پی نا ستاءِ کرے۔
