اسلام آباد۔ 20 فروری (اے پی پی) صدر مملکت ڈاکٹر عارف علوی ملکی برآمد آتے ٹی ودکی ءِ وخت انا اہم انگا گرج گوندسا پارینے کہ دارداٹ حکومت ونجی بشخ ءِ اواری اٹ کاریم کروئی تمک۔ اوداہیت ءِ فیڈریشن آف پاکستان چیمبرز آف کامرس اینڈ انڈسٹری نا پوسکن گچین مروک آ عہدیدار آتون گپ و تران کرسا پارے ہراچارشنبے نادے آ اوڑتون اوڑدہی کریر۔ صدر مملکت پارے کہ ملک انا شونداری ٹی نجی و کاروباری بشخ ءِ بے کچ اہم کڑد اس اداکروئی مریک۔ اوپارے کہ برآمد آتے ٹی ودکی وخت انا اہم انگا گرج ءِ دارداٹ حکومت و نجی بشخ ءِ اواری اٹ کاریم کروئی مریک۔ صدر مملکت پارے کہ زرکارآتے درملکی زرکارآتون اسیجا ڈٹ آتیا کاریم بایدے کروئی مرے۔ اوپارے کہ سعودی ولی عہد نا ساڑی آ دورہ بے کچ سرسہب مس، زرکاری و کاروباری بشخ آتے ٹی کیہی مفاہمت نا یات داشت آتیا دستخط کننگا۔ اوپارے کہ پوسکن آ دور اٹی کاروبار نا رجحانک ہم بدل مننگ ءُ، ساڑی آ دور اٹی گڑاتا بروخت ترسیل کلیدی ءُ حیثیت اس اختیار کرینو۔ صدر مملکت دا ہیت آ زور شاغا کہ فشریز نا بشخ اٹی شونداری نا بھلو گمان ارے۔ داوخت آ ڈل صدر مملکت ءِ پارے کہ سعودی زرکارآتون اوڑدہی فائدہ مند و سرسہب مس۔ ڈل صدر مملکت ءِ ملکی شونداری ٹی ہروڑنا کڑد ادا کننگ نا باوری ترفے۔
