اسلام آباد۔ 20فروری (اے پی پی) بنجائی وزیر کانود و انصاف بیرسٹر فروغ نسیم پارینے کہ ساڑی حکومت زالبول دوست کانودسازی آ باور کیک، زالبول ءِ بااختیار کننگ و اوفتا حق انا رکھ اکن گام گیج کننگ ءِ، سلاہ ئی کانود سازی آن عدالتی نظام نا پوسکن ءُ دور اس بناکیک، اپوزیشن نا کنڈآن اڑاند آتا باوجود حکومت الس نا فائدہ غاتے ٹی اولیتی بنداو تیا کانود سازی کن پرعزم ءِ۔ داخیال آتا درشانی ءِ او داڑے برطانوی لیبر پارٹی نا باسک پارلیمنٹ ناز شاہ نا سرکڑدہ ہی ٹی دولت مشترکہ پارلیمنٹرینز ایسوسی ایشن نا ڈل اتون گپ و تران کرسا کرے۔ اوپارے کہ زالبول نا میراتی حق انا بابت زالبول پراپرٹی بل آ عملدرآمد کن بنجائی دارالحکومت تون اوار ہر چار آ صوبہ غاتے ٹی زالبول محتسب تعینات کننگ نا سلاہ غا سجفنگ انگ ءِ۔ اوپارے کہ زالبول نا میراتی ویل آتا بابت غاوتا فیصلہ ءِ اِراتُواٹی کننگک ، واہم جھیڑہ سے نا حالیت اٹ معاملہ ءِ عدالت آ گدریفنگک۔ اوپارے کہ لیگل اتھارٹی نا ٹہیفنگ آن اختہ مروک آ تپہ غاک خاص کر زالبول و چناتے کانودی کمک فراوان کننگک وخت اس کہ منشیات نا اسمگلنگ اٹی اوار زالبول ءِ کم آن کم سزا تننگ کن کانودسازی کننگ انگ ءِ ولے دانا پشت پناہی ءِ کروک آتے پاش کرسا سخت سزا تننگک۔ داوخت آ ڈل اونا سلاہ تا ستاءِ کرے۔ بنجائی وزیر کانود و انصاف سامیہ شاہد و فہد ملک نا خون نا بابت ڈل انا گڑتی تا ورندی ءِ ترسا پارے کہ پاکستان اٹی عدالت آک آزادانہ وڑاٹ کاریم کننگ ءُ و دا مقدمہ غاتے کانود نا رداٹ چٹفنگک۔ پیشن نا ملک رہینگوک آ پاکستانی تا میرات آتیا کوزہ نا بابت بنجائی وزیر پارے کہ ہر ڈوہ انا پداٹ گڑاس مالی پلو مریک ولے وزارت کانود دروہ تننگ ءِ توننگ کن ہروڑنا گام گیج کننگ ءِ ، نن پاکستان اٹی زرکاری نا است خواہ پاکستانی پردیسی تے ہم آسراتی تننگ کن کاریم کننگ اُن اگہ کس اس پاکستان اٹی زرکاری کننگ خواہک تو اودے وزارت اوورسیز پاکستانیز اٹی رجسٹریشن کرفوئی مریک، دُن انگا مقدمہ غاتے ٹی جھیڑہ غاتا ایسری کن خصوصی اوورسیز کورٹ اس جوڑ کننگ نا سلاہ ءِ۔ اوپارے کہ پاکستان اٹی لینڈر یکارڈ ءِ کمپیوٹرائزکننگ انگ ءِ۔ اوپارے کہ دیوانی مقدمہ غاتے 2سال انا وخت اٹی چٹفنگ کن بل اس اتنگ اُن وخت اس کہ میراتی مقدمہ غاتے 15دے اٹی چٹفنگک۔ داکان مست دیوانی مقدمہ غاتے چٹفنگ اٹ 40,40 سال لگاکہ وخت اس کہ میراتی مقدمہ غاتے 7 آن 8 سال اٹی چٹفنگاکہ۔ اوپارے کہ وسل بلورز کانود آن وڈی خوری ءِ توننگ اٹ کمک ملک وخت اس کہ وسل بلورز نا رکھءِ کننگک۔ پارلیمانی سیکرٹری کانود و انصاف ملیکہ بخاری داوخت آ حکومت نا کنڈآن زالبول و مسن تے کن ایکشن پلان نا بابت سرجم آتیان معلومدار کرے۔ اوپارے کہ حکومت خاص کر زالبول نا عصمت دری و صنفی بنداو تیا ڈوہ انا بابت زالبول دوست کانود سازی کننگ ءِ۔ دولت مشترکہ نا پارلیمانی ایسوسی ایشن نا ڈل بنجائی وزیر کانو د و انصاف و پارلیمانی سیکرٹری کانود و انصاف نا منت واری ءِ ہرفے و صنفی ویل آتا بابت پاکستان تون اوار ی اٹ کاریم کننگ نا است خواہی نا درشانی ءِ کریر۔
