حکومت ملک اٹی آبی وسیلہ غاتا شونداری کن مربوط ڈٹ بندی کننگ ءِ، کچھی کینال ڈٹ لکھ آ ایکڑ رقبہ ءِ سیراب کیک
اسلام آباد۔ 20 فروری (اے پی پی) بنجائی وزیر ڈٹ بندی مخدوم خسرو بختیار پارینے کہ ساڑی حکومت ملک اٹی آبی وسیلہ غاتا شونداری کن مربوط ڈٹ بندی کننگ ءِ ہندا رداٹ کچھی کینال ڈٹ صوبہ بلوچستان نا علاقہ ڈیرہ بگٹی ٹی کشت وکشار کن دیر انا فراوانی ٹی کمکار جوڑ مریک ، لکھ آ ایکڑ رقبہ ءِ سیراب کیک۔ داخیال آتا درشانی ءِ او سنٹرل ڈویلپمنٹ ورکنگ پارٹی نا دیوان اٹی آبی وسیلہ ڈویژن نا کنڈآن کچھی کینال ڈٹ آ ہیت کرسا کرے۔ بنجائی وزیر پارے کہ کچھی کینال ڈٹ آن کشاری پیدوار اٹی ودکی مریک، کشاری ڈٹ آتا مون آ دننگ اٹ کمک ایتک، و پین دا ڈٹ انا رداٹ بلوچستان نا ہندی کمیونٹی کن کنوئی ءُ ساف دیر انا دستیابی ءِ المی جوڑ کیک، دیوان اٹی کچھی کینال ڈٹ انا تکنیکی پلو آتے مون آ تخسا بنجائی وزیر ڈٹ بندی مخدوم خسرو بختیار دا ڈٹ انا سرجم جاچ ءِ ہلنگ کن اسہ کمیٹی اس جوڑ کرے ہرا 15دے انا تہہ ٹی تینا رپورٹ ءِ وزارت ڈٹ بندیءِ پیش کیک۔ دیوان اٹی آبی وسیلہ ڈویژن نا کنڈآن ارٹ میکو ڈٹ برج عزیز خان ڈیم پروجیکٹ پشین لوراکن 67.407 ملین روپئی نا خڑچ انا ڈٹ اس پیش کننگا، دا ڈٹ آ ہیت کرسا بنجائی وزیر خسرو بختیار پارے کہ دا ڈٹ کوئٹہ شار انا مخلوق ءِ 21ملین گیلن دیر ایتک ہراڑان شار اٹی دیر انا کاختی نا مون ءِ توننگ اٹ کمک ملک۔ دا ڈٹ ءِ دیوان منظور کرے۔
