اسلام آباد۔19فروری (اے پی پی) مزن وزیر عمران خان ءَ بھارت ءَ را پلوامہ اُرش ءِ پٹءُ پولءَ کمک کنگءِ گشتگءُ کھڈن کتگ کہ بھارت اگاں اُرش کنگءِ حیال ءَ اِنت گڑا حاموش پاکستان ہم نہ بیت۔ اگاں جنگ بندا ت کنگ بوت گڑا گپ دور رؤت ، بھارت ءَ را پلوامہ اُرشءِ جستءُ پرسءُ پٹءُ پول کنگءَ کمک کنگءِ گپءَ کناں ، بھارتءِ گورءَ اگاں پاکستان ءِ حلاپءَ سبوت بوت گڑا مارا بگش ایت ما وت کاروائی کناں۔ نوکیں پاکستان نوکیں حیال اِت، نہ کسے مے سرڈگار ءَ چہ ناشرکاری بہ کنتءُ نہ پاکستانءَ بہ ایتءُ ناشرکاری بہ کنت، اوگانستان ءِ وڑءَ کشمیر ءِ جیڑہ ءَ را ہم گپءُ تران ءَ چہ گیش ءُ گیوار کنگ لوٹاں۔ بھارت حیال بہ کنت کہ کشمیری ورناہ آں مر گ ءِ ترس دیریں یل کتگ۔ پلوامہ وئیل ءِ ہوالگءَ سے شمبے ءِ روچءَ راج ءَ گوں تران کنان ءَ مزن وزیر عمران خان ءَ گشتگ کہ مقبوضہ کشمیرءِ دمگ پلوامہ ءَ لھتیں روچ پیسر یک وئیلے بوتگ، ایشی ءِ بھتان پاکستانءَ جنگ بوہگءَ اِنت۔ من ہما وہدءَ ایشیءِ پسو دیئگ لوٹ اِتگ بلے سعودی ولی عہد ءِ پاکستانءِ ترءُ تابءِ سوبءَ من فیصلہ کتگ بوتگ کہ انو پسو دیئگ مہ بیت سعودی ولی عہد ءِ ترءُ تاب ہلاس بیت گڑا پسو دیئگ بیت۔ آئیءَ گشتگ کہ وہدے کہ ولی عہد واترشتگ گڑانوں من بھارتءَ را پسو دیئگ لوٹاں۔ مز ن وزیر ءَ گشتگ کہ بھارتءَ بے سبوتءَ پاکستانءَ را بھتان جتگ۔ آئیءَ گشتگ کہ اے وڑیں وئیل کنگءِ اہچ فائدگ نیست ، سعودی ولی عہد ءِ ترء تابءَ را ماٹو کنگءِ ھاترءَ اے وڑیں لگوری کار کنگ بوتگ۔
