کوئٹہ۔ 19 فروری (اے پی پی) قومی احتساب بیورو بلوچستان محکمہ مال انا آفیسر آتا کنڈآن گوادر اٹی کروڑ آ روپئی مالیت نا سرکاری ڈغار تا ریکارڈ ءِ ٹیمپر کرسا بہاکننگ نا پت پاش مننگ آ مسکوہی تحصیلدار گوادر محمد جان بلوچ، محمد جان جمالدینی، مسکوہی نائب تحصیلدار گوادر آغاظفر حسین و پٹواری عبدالحفیظ ءِ دزگیر کرینے، ترجمان نیب بلوچستان نا رداٹ قومی احتساب بیورو ٹی محکمہ مال نا آفیسر آتا برخلاف جاری سرکاری ڈغار تا وڈی خوری ناجاست وپاست اٹی اہم ءُ پیش رفت اس مون آ بننگ آ ڈی جی نیب بلوچستان محمد عابد جاوید دوبہ دار آتا وارنٹ دزگیری ءِ جاری کرے ہراڑا نیب انا انٹیلی جنس ٹیمک اوفتے جتا علاقہ غاتیان دزگیر کریر، ڈی جی نیب بلوچستان محمد عابد جاوید داوخت آپارے کہ سرکاری وسیلہ غاتا لٹ وپل کروک وڈی خور عنصر آتا محاسبہ ءِ کننگک، سزا وجزا نا عمل و بے پرخ احتساب کانود نا حکمرانی نا اساس ءِ ، خلقت نا حق ءِ کنوک آتون ہچ ءُ رعایت اس کننگپک۔ اوپارے کہ قومی احتساب بیورو وڈی خوری نا چٹفنگ و لٹ وپل کروک آ ملکی دولت ءِ قومی خزانہ ٹی پدی اتنگ کن تینا آئینی زمواری تے جوانی اٹ پورو کننگ ءِ۔
