وزیراعظم عمران خان نا بھارت ءِ پلوامہ جلہو نا جاست وپاست اٹی کمک نا سلہ
بھارت جلہو نا سجفے تو پاکستان اونا پبی ورندی ءِ ایتک، جنگ بناکننگا تو ہیت مرغن مریک
اسلام آباد۔ 19 فروری (اے پی پی) وزیراعظم عمران خان بھارت ءِ پلوامہ جلہو نا جاست و پاست اٹی کمک نا سلہ خلسا خبڑ دار کرینے کہ اگہ بھارت جلہو نا سجفے تو پاکستان اونا پبی ورندی ءِ ایتک، جنگ ءِ بناکننگا تو ہیت مرغن مریک، دادے اللہ جوان چاہک، بھارت ءِ پلوامہ جلہو نا جاست وپاست اٹی کمک نا سلہ خلینہ، بھارت تون پاکستان نا اوار مننگ نا شاہدی ارے تو اوفتے ننے ایتے، نن کارروائی کینہ۔ پوسکن آ پاکستان اٹی پوسکن ءُ سوچ اسے، دا ہیت ننا تینا فائدہ ٹی ءِ کہ نئے تو ننا گل زمین آن پیشن ہنسا کس اس دہشت گردی کے و نئے پاکستان آ برے کس اس دہشت گردی کے، اوغانستان آنبار کشمیر نا ویل ہم ہیت وگپ اٹ ایسر مریک۔ بھارت سجفے کہ کشمیری ورناتے ٹی مرک انا خوف انتئے چٹانے۔ پلوامہ نا واقعہ نا بابت سے شنبے نا دے آ قوم اتون نشریاتی تران اٹی وزیراعظم عمران خان پارے کہ مقبوضہ کشمیر نا علاقہ پلوامہ ٹی منہ دے مست اسہ واقعہ اس مس ، اونا دوبہ ءِ پاکستان آ خلنگانے۔ اوپارے کہ ای ہمووخت آ اوڑا ردعمل نا درشانی ءِ کننگ خواہسوٹہ انتئے کہ پاکستان آدوبہ خلنگاسس ولے سعودی ولی عہد نا دورہ پاکستان نا سوب آن ای فیصلہ کریٹ کہ داسہ ورندی تننگپ تانکہ سعودی ولی عہد نا دورہ غان چکار اسہ کنڈ مف۔ اوپارے کہ ولی عہد پدی ہنا تو ای بھارتی حکومت ءِ ورندی تننگ خواوہ۔ وزیراعظم پارے کہ پاکستان آ بے شاہدی دوبہ خلنگا۔ اوپارے کہ پاکستان ءِ داوڑنا واقعہ غاتے ٹی اوار مننگ نا ہچ ءُ فائدہ اس اف، سعودی ولی عہد نا دورہ نا وخت آ احمق اس دورہ ءِ لتاڑنگ کن داوڑنا واقعہ کیک۔ اوپارے کہ پاکستان اسہ ہندن ءُ مرحلہ اسے ٹی ءِ ہراتم او سوگوی نا کنڈا ہِننگ ءِ ، نن 15 سال دہشت گردی نا برخلاف جنگ کرین ہراٹی 70 ہزار پاکستانی شہید مسر، داسہ امن و سوگوی بننگ ءِ داحالیت اٹ ننے داوڑنا واقعہ غاتیان انت فائدہ اس مریک۔ اوپارے کہ ای بھارتی حکومت آن ہریفنگ خواوہ کہ انت نمے مستین اٹ اختہ مروئی ءِ و ہروار انت کہ سانحہ اس کشمیر اٹی مرے تو نمے پاکستان ءِ زموار کرفوئی ءِ، دانا جاگہ غاکشمیر نا ویل انا ایسری نا کنڈا پیش رفت کننگے۔ اوپارے کہ ای واضح وڑاٹ پاننگ اُٹ کہ دا پوسکن آ پاکستان ءِ ، پوسکن ءُ سوچ اسے، اوپارے کہ ای اینو بھارت ءِ پیش کش کننگ اُٹ کہ او پلوامہ جلہو نا ہراکہ وڑنا جاست و پاست کرفنگ خواہک تو کرفے، و اگہ اوڑتون پاکستانی اسے نا اوار مننگ نا شاہدی اس ارے تو اوفتے ننے تننگے۔ ای ضمانت ایتیوہ کہ نن کارروائی کینہ انتئے کہ اگہ کس اس پاکستان نا گل زمین ءِ کاریم اٹ اتنگ ءِ تو دا ننا فائدہ غاتا برخلاف و پاکستان تون دشمنی اسے۔ اوپارے کہ ہراتم نن بھارت تون مذاکرات نا ہیت ءِ کینہ تو او دہشت گردی آ ہیت کننگ نا شڑت ءِ تخک ، دہشت گردی مچ آ ڈیہہ نا معاملہ ءِ و نن خوانہ کہ دہشت گردی چٹے انتئے کہ دہشت گردی آن غٹ آن زیات زہمی پاکستان مسنے، 70 ہزار پاکستانی شہید مسنو و معیشت ءِ 100 ارب ڈالر آن زیات نسخان مس۔ اوپارے کہ ای داوخت آ اِرا گڑا پاننگ خواوہ، ہندوستان اٹی اسہ پوسکن ءُ سوچ اس بایدے برے و اودے غور و فکر کروئی مرے کہ انت سوب اسے کہ کشمیر نا ورناتے ٹی مرک انا خلیس چٹانے، سوب اس مریک۔ اوپارے کہ انت بھارت سمجھک کہ فوج انا کمک اٹ دا ویل ایسر مریک، فوج انا کمک اٹ اسہ ویل انا ایسری اس اینو اسکان سرسہب متنے تو مون آ ہمہ سرسہب مریک۔ اگہ اینو اوغانستان نا تہٹی 17 سال آن پد مچ آ دنیا امنا کرینے کہ دا ویل انا فوجی ایسری اس اف و دا معاملہ ہیت وگپ اٹ ہی ایسر مریک تو بھارت اٹی ہم داڑا بایدے شرہ مرے۔ اوپارے کہ نن بھارت آن بروک آ توارتے بِننگ اُن، میڈیا وسیاست دان تا توار ک بننگ ءُ کہ پاکستان ءِ سبخ اس تروئی مرے و بیر ءِ ہلوئی مرے۔ وزیراعظم پارے کہ اولیکوہیت تو دادے کہ دنیا نا ہراکانود اسہ بندغ یا ملک اسے جج، جیوری یا ایکسیکیوشن مننگ نا موکل ایتک، دا ہراانصاف نا نظام اٹی ءِ۔ ارٹ میکو ہیت دادے کہ بھارت اٹی دا گچین کاری تا سال ءِ و پاکستان ءِ سبخ تننگ نا نعرہ گچین کاری کن ءِ۔ وزیراعظم واضح کرے کہ بھارت پاکستان آ ہراوڑنا جلہو کیک تو پاکستان ورندی تننگ کن سجفپک بلکن پاکستان ورندی ایتک و ننتون ورندی تننگ آن بیدس پین ہچ ءُ کسر اس مفک۔ اوپارے کہ نن کلءِ چانہ کہ جنگ ءِ بناکننگ آسان ءِ ، جنگ ءِ بناکننگ انسان نا دوٹی مریک ولے جنگ ءِ چٹفنگ انسان نا دوٹی مفک۔ جنگ انا حالیت اٹ دا ہیت ہراتسکان کاہک ، اللہ ہی جوان چاہک، ہنداخاطران ای اومیت کیوہ کہ نن عقل و حکمت ءِ کاریم اٹ اتینہ و کشمیر نا ویل بالآخر اوغانستان آنبار ہیت وگپ اٹ ایسر مریک۔
